Almaty oblysynda quny 96 mln teńge bolatyn kontrabanda úshin eki azamat sottaldy

ASTANA. QazAqparat - Bas kólik prokýratýrasy tekserý barysynda 96 mln teńgeden astam somaǵa ekonomıkalyq kontrabandanyń belgileri bar qylmystyq quqyq buzýshylyqty ashty. Bul týraly vedomstvonyń baspasóz qyzmetine silteme jasaı otyryp QazAqparat habarlaıdy.

Atap aıtqanda, «AlemKazKargo» JShS atyna kelgen avtokólikti tekserip qaraý kezinde kedendik rásimdeýde aıtylmaǵan taýarlar, ıaǵnı avtobólshekter, uıaly telefondarǵa qosalqy bólshekter jáne basqa da zattar anyqtaldy. Negizi bul kóliktiń ishindegi zattardy tranzıttik deklaratsııa berý kezinde Almaty oblysy boıynsha MKD «Altynkól» keden beketiniń mamany teksergen bolatyn. 

Seriktestik dırektorynyń zańsyz áreketi jáne keden mamanynyń óz jumysyna adal qaramaýy saldarynan memleketke 27 mln teńgeden astam shyǵyn keldi.

«Oblystyń eki aýdandyq sotynyń úkimimen ekonomıkalyq kontrabandany uıymdastyrǵany úshin (QK 234-babynyń 2-bóliginiń 4-tarmaǵy) kásipker 2000 AEK mólsherinde aıyppul tóleıdi, al memlekettik organ qyzmetkerine salǵyrttyqqa jol bergeni úshin (QK 371-babynyń 2-bóligi) 2 jylǵa bas bostandyǵyn shekteý jazasy taǵaıyndaldy» dep habarlady Bas kólik prokýratýrasy. 

96 mln teńgeden astam somadaǵy kontrabandalyq zattar memleket kirisine aınaldy.

Sot úkimi zańdy kúshine endi.