Almaty oblysynda quny 42 mlrd. teńge bolatyn birneshe memorandýmǵa qol qoıyldy

TALDYQORǴAN. QazAqparat - Almaty oblysynda Elbasynyń «Rýhanı jańǵyrý: Bolashaqqa baǵdar» atty baǵdarlamalyq maqalasy aıasynda Talǵar aýdanynyń týmalary týǵan jerinde bas qosty. «Talǵar ınvest» jerlester forýmynda jalpy quny 42 mlrd. teńge bolatyn birneshe memorandýmǵa qol qoıyldy, dep habarlaıdy QazAqparat tilshisi.

Bolashaqta júzege asatyn ınvestıtsııalyq jobalarǵa besaǵashtyq jeke kásipker Qaıyr Meıirbekov te óz úlesin qospaq. Ol «Týǵan jer» baǵdarlamasy aıasynda quny 100 mln. teńge bolatyn kólemi 485 sharshy metrlik sport zalyn turǵyzyp, aýyl ákimshiliginiń ıgiligine tapsyrmaqshy. Sondaı-aq Besaǵash aýyldyq okrýginde 75 gektar aýmaqqa kópsalaly týrıstik-saýyqtyrý ekokesheni de salynatyn bolady. Aýqymdy ınvestıtsııalyq jobalardyń ishinde Talǵar ózeniniń jaǵalaýyn nyǵaıtý jumysy da bar. Bul jobanyń jalpy quny 6 mlrd. teńgeden asady.
 

Jalpy Talǵar aýdanynda «Týǵan jer» baǵdarlamasy sheńberinde kóptegen ıgi ister atqarylýda. Onyń aıasynda Panfılov, Tóńkeris aýyldarynda jańa meshit halyq ıgiligine berilip, Bereke aýylynda kópir salyndy. Tuzdybastaý aýylyndaǵy mádenıet úıinde ólkelik mýzeı ashyldy.

Aıta ketý kerek, búgingi «Talǵar ınvest» jerlester forýmy aýdannyń eń kórikti demalys oryndarynyń biri sanalatyn «Segiz kól» kesheninde ótti.