Almaty oblysynda kóz jumǵan naýqasta menıngıt rastalmady

ASTANA. QazAqparat - Almaty oblysynda aýrýhanada kóz jumǵan naýqasta «menıngıt» dıagnozy rastalmady, dep habarlaıdy QazAqparat tilshisi QR Densaýlyq saqtaý mınıstrliginiń baspasóz qyzmetine silteme jasap.

«Budan buryn jyl basynan beri respýblıkada 13 ólim bolǵany málimdelgen edi. 13 maýsym saǵat 09:00-degi jaǵdaı boıynsha, zerthanalyq zertteýler nátıjesinde Almaty oblysynda  qaıtys bolǵan bir adamda menıngokokk ınfektsııasy rastalmady», - delingen habarlamada.

Vedomstvodan málim etkendeı, Qazaqstanda 2018 jyldyń basynan menıngokokk ınfektsııasynyń 59 jaǵdaıy tirkelgen. Onyń ishinde 14 jasqa deıingi balalar arasynda - 21 jaǵdaı anyqtalyp, onyń 12-si ólimmen aıaqtaldy (Almaty qalasynda - 6 jaǵdaı, Almaty oblysynda - 3 jaǵdaı, Ońtústik Qazaqstan oblysynda - 2 jaǵdaı jáne Qyzylorda oblysynda - 1 jaǵdaı).

«Jaǵdaı Densaýlyq saqtaý mınıstrliginiń baqylaýynda tur», - delingen taratylǵan aqparatta.

Aýrýdyń alǵashqy sımptomdary (tamaq qyzarý, dene qyzýynyń kóterilýi, bastyń aýyrýy, álsizdik) paıda bolǵan kezde dereý dárigerlerge júginip, nusqaýlardy muqııat oryndaý qajet.

Ártúrli kópshilik mádenı sharalarǵa qatysýdy, júzý basseınderine, saýda, oıyn-saýyq ortalyqtaryna barýdy shektep, jeke gıgıenany saqtaý kerek.

Jumys oryndarynda bólmelerdi jıi jeldetip, ylǵaldy tazalyq jumystaryn júrgizip otyrǵan abzal. Tek qaınaǵan nemese bótelkedegi sýdy qoldaný qajet. Tońý, ashyǵý, uıqynyń qanbaýy sekildi jaılardy boldyrmaýǵa tyrysý kerek.

Aýryp em izdegennen, onyń aldyn alý áldeqaıda jeńil ekendigin este saqtaǵan jón.