Almaty oblysynda kóz jumǵan eki oqýshyǵa qatysty jańa derekter aıtyldy
«Kegen aýdany Saty aýylynda 11 sáýirde saǵat 23:00 shamasynda qaıǵyly oqıǵa boldy. Kámelet jasyna tolmaǵan 11-synyp oqýshy Baqyt Álisher 10-synyptyń balalaryn ózen jaǵasyna shaqyryp, keýdelerine bir-bir soqqydan jasaǵan. Mıras Áskerbaı sol jerde esinen tanyp qulap, jan tapsyrǵan. Quqyq qorǵaý organdary sotqa deıingi tergeý amaldaryn bastady. Jasóspirimniń qazasynyń sebebin anyqtaýǵa qatysty sot-medıtsınalyq saraptama júrgizilip jatyr», - dedi G. Isaǵulova Oqý-aǵartý mınıstrligindegi balalardyń qaýipsizdigi máselesine arnalǵan jıynda.
Onyń aıtýynsha, kúdikti B. Álisher 7-synyptan bastap 9-synyp aralyǵynda Taldyqorǵandaǵy Jaqsylyq Úshkempirov atyndaǵy sport mektep-ınternatynda bilim alǵan. Otbasyndaǵy jaǵdaıǵa baılanysty aýylǵa qaıtadan kelgen. Qazir bul bala úıqamaqqa shyǵaryldy.
Sonymen qatar, bilim basqarmasynyń ókili dál sol aýylda kóz jumǵan ekinshi oqýshyǵa qatysty málimetti jarııalady.
«13 sáýir kúni saǵat 00:00-ge qaraı Saty aýylynda orta mekteptiń 10-synyp oqýshysy Dastan Baıtursyn turǵyn úıdiń aýlasyndaǵy mal qorasynda asylyp, qaıtys boldy. Bala ákesine malǵa shóp salamyn dep, úı aýlasyna shyǵyp ketken. Keıin balanyń asylyp qalǵanyn anasy kórgen. Qazir osy oqıǵa boıynsha tergeý amaldary júrip jatyr», - dedi Gúlsara Isaǵulova.
Onyń sózine qaraǵanda, Mıras pen Dastan mektepte jaqsy oqyǵan.
«Oblys ákiminiń tapsyrmasy boıynsha Bilim basqarmasy tıisti komıssııa quryp, tekserý júrgizdi. Osy oraıda, arnaıy is-qımyl jospary jasalyp, barlyq qurylymdyq mekemelerge, quzyrly organdarǵa tapsyrmalar berildi. Saty aýylynda orta mektep dırektoryna, onyń tárbıe jónindegi orynbasaryna, synyp jetekshisine tártiptik shara qoldanyldy», - dedi basqarma ókili.
Búgin onlaın rejımde ótken jıyn barasynda Oqý-aǵartý mınıstri Ǵanı Beısembaev oblystyq bilim basqarmasyna máseleni tolyq baqylaýda ustaýdy tapsyrdy.
Buǵan deıin «jasóspirimniń densaýlyǵyna aýyr zııan keltirdi» degen kúdikpen Kegen aýdanynyń 17 jastaǵy turǵyny ustalǵany habarlanǵan bolatyn.