Almaty oblysynda koronavırýstyń taralýyna jol bermeý maqsatynda komıssııa quryldy

TALDYQORǴAN. QazAqparat - Almaty oblysynda koronavırýstyń óńirge kirý jáne taralýyna jol bermeý jumystary kúsheıtildi. Oblystyń quzyrly organdary birigip, vedomstvoaralyq komıssııa qurdy, dep habarlaıdy QazAqparat tilshisi.

Qazirgi tańda juqpaly aýrýmen aýyrǵan naýqastarǵa arnalǵan 550 oryn bar. Onyń 237-si - eresekterge, qalǵan 313-i - balalarǵa arnalǵan.

Álemde qalyptasqan jaǵdaıǵa baılanysty qosymsha 580 rezervtik oryn daıyn. Medıtsınalyq mekemeler qajet dári-dármek, qural-jabdyq, qorǵanys zattarymen qamtamasyz etildi.

Sondaı-aq QR densaýlyq saqtaý mınıstrligi qorǵaný kostıýmderi, betperdeler men naýqastardy tasıtyn arnaıy kapsýlalarǵa, vırýsqa qarsy preparattarǵa qosymsha tapsyrys berdi.

Almaty oblystyq densaýlyq saqtaý basqarmasy baspasóz qyzmetiniń málimetinshe, óńir basshylary men vedomstvoaralyq komıssııa quramyndaǵy mamandar shekaralyq beketter men keden beketterin qadaǵalap, sol mańdaǵy aýrýhanalardyń daıyndyǵyn pysyqtap, baqylaýdy kúsheıtti.

Barlyq medıtsına mekemelerinde mamandarǵa koronavırýsty anyqtaý, dıagnostıka júrgizý jáne aldyn alý boıynsha semınarlar ótkizilýde.