Almaty oblysynda qoǵamdyq uıym polıtseılerge alǵys bildirdi

TALDYQORǴAN. QazAqparat - Almaty oblysynda polıtsııa qyzmetkerleri 32 jastaǵy áıeldiń balalarymen qosylýyna yqpal etti. Qarasaı aýdanyndaǵy bir otbasynyń máselesin sheshýge polıtsııa departamentiniń basshysy Murat Urumhanovtyń tikeleı tapsyrmasy sebepshi bolǵan eken, dep habarlaıdy QazAqparat tilshisi.

Jýyrda «NemolchıDetıKZ» qoǵamdyq qorynyń ókili Dına Tańsári oblystyq polıtsııa departamentiniń basshysy M. Urumhanovtyń jeke paraqshasyna Qaskeleńde turatyn otbasynyń jaǵdaıyn baıandap, jazǵan bolatyn. Anyqtaı kele otbasylyq janjalda kúıeýiniń soqqysynan keıin azamatsha aýrýhanaǵa túsip qalǵan. Erli-zaıyptylar azamattyq nekede turyp, úsh bala tárbıelep jatqan. Jábirlenýshi áıel basqa eshqaıda aryz-shaǵym jazbaǵan. Biraq tártip saqshylary uryp-soǵý deregi boıynsha aryzdy aldyrtty. Qazirgi tańda Qarasaı aýdanynyń polıtseıleri tergeý amaldaryn jalǵastyryp, oqıǵa boıynsha derekter jınastyrýda. Almaty oblystyq polıtsııa departamentiniń baspasóz qyzmeti álgi azamat mindetti túrde jaýapqa tartylatyndyǵyn habarlaǵan.

Polıtsııanyń aralasýymen ana úsh balasymen qaıta qaýyshty. Aıta ketý kerek áıel emdelip bolǵansha balalar ápkesiniń qaraýynda bolǵan.

Sondaı-aq bul oqıǵada bala asyraý organdarynyń qyzmetkerleri de belsendilik tanytqan. «NemolchıDetıKZ» qoǵamdyq qorynyń ókilderi osyǵan baılanysty jedel áreket etip, adamgershilik tanytqany úshin polıtseılerge áleýmettik jeli arqyly alǵystaryn jetkizdi.

«Osy bir qaýyshý sát óte áserli boldy. Meni erekshe sezimder baýrap, barlyq qyzmetkerlerge alǵys aıtqym keldi. Kishkentaı sábı anasynyń keýdesine jabysyp, saǵynǵanyn kórsetti. Balalar endi qaýipsiz jerde, bizdiń kóńilimiz tynysh. Alda sot bolady. «NemolchıDetıKZ» qoǵamdyq qory Almaty oblystyq polıtsııa departamentiniń qyzmetkerlerine jedel kómek kórsetip, qoldaǵandary úshin alǵys bildiredi» - dep Dına Tańsári áleýmettik jelidegi paraqshasynda atap ótti.