Almaty oblysynda kıeli jerlerdiń elektrondyq kartasy jasaldy

ASTANA. QazAqparat - Almaty oblysyndaǵy 2343 eskertkish oryndary engen «Kıeli jerlerdiń elektrondyq kartasy» jumys istep tur. Bul týraly búgin Astanada Ortalyq kommýnıkatsııalar ortalyǵynda ótken baspasóz máslıhatynda Almaty oblysynyń ákimi Amandyq Battalov málim etti, dep habarlaıdy QazAqparat tilshisi.

«Qazaqstannyń kıeli kartasy» jobasy aıaynda Almaty oblysynda 58 oryn tańdalyp alyndy. Onyń 17-i respýblıkalyq, al 41-i oblystyq tizimge engizildi», - dep habarlady ol.

Amandyq Battalov keltirgen málimetke sáıkes, karta aımaqtyń kıeli oryndary men tabıǵı eskertkishteri týraly mádenı jáne tarıhı málimetterdi alýǵa múmkindik beredi.

«Ol kartadan kıeli oryndardyń ornalasqan jerin, tarıhyn, baǵdaryn, fotosýretteri jáne beınematerıaldardy tabýǵa bolady», - dedi spıker.

Oblys basshysynyń atap ótýinshe, zamanaýı aqparattyq tehnologııalardy engizý kez kelgen sapardyń logıstıkasyna aıtarlyqtaı jeńildik beredi.

«Mysal keltireıin. Máselen, «Jetisý-360» jobasy boıynsha aımaqtyń týrıstik baǵdaryna ornatylǵan navıgatsııaly arnaıy 255 QR kórsetýshisi pen oblystyń mýzeılerine arnalǵan 3D-týr bar. Kez kelgen gadjet arqyly zhetysu360.kz siltemesine ótip, siz úıden shyqpaı-aq vırtýaldy saparǵa shyǵa alasyz», - dedi oblys ákimi.

Amandyq Batalov baǵdarlamany júzege asyrýǵa aımaqtyń jastary belsendi qatysyp jatqanyn atap ótti.

«S.Demırel atyndaǵy ýnıversıtettiń stýdentteri iOs jáne Android úshin úsh tilde «Jetisýdyń kıeli oryndary» atty mobıldik qosymsha jasap shyǵardy», - deıdi ákim.

Budan basqa Amandyq Batalovtyń aıtýynsha, oblysta «Jetisý geografııalyq birlestigi» qurylǵan. Ol birlestik Jetisýdyń skretch kartasyn jasap shyǵarǵan.