Almaty oblysynda qaıyrymdy jandar Ekibastuzǵa 500 jylytqysh qural jetkizdi

QONAEV. QazAqparat - Almaty oblysy ákimdiginiń bastamasymen Ekibastuzǵa gýmanıtarlyq kómek jóneltildi, dep habarlaıdy QazAqparat tilshisi.

Kásipker jáne metsenat Zııa Talǵatov qıyn jaǵdaıda qalǵan ekibastuzdyqtarǵa qoldan kelgenshe kómek kórsetýge úles qosatynyn, shette qalmaıtynyn atap ótti.

«Qazir 500 dana jylytqysh qural tıelgen júk kóligi jolǵa shyqty. Bizdiń kompanııa qaıyrymdylyq jumystarymen belsendi túrde jıi aınalysady. Jyl saıyn bıýdjetke halyqty áleýmettik qoldaý úshin, onyń ishinde mektep, úı, meshit salýǵa jáne eldiń shalǵaı óńirlerindegi balalarǵa syılyq taratý maqsatynda shamamen 30 mıllıon teńge bólinedi. Eń qıyn saǵatta adamdardyń bir-birin qoldap, bir múdde aıasynda birige alýy tutas eldiń birligin arttyryp, eldiń ishki rýhynyń myqty bolýyna septigin tıgizedi», - deıdi Zııa Talǵatov.

Sondaı-aq, bıznesmen logıstıka jáne kommýnıkatsııa máselesinde Almaty oblysynyń ákimdigi qoldaý kórsetkenin atap ótti.

Búginde jylytý quraldary Ekibastuz turǵyndarynyń ótinimine sáıkes taratyldy.

Ekibastuz qalasy ákiminiń orynbasary Marııam Malıkova atap ótkendeı, atalǵan jylytý quraldary Baýyrjan Momyshuly men Máshhúr Júsip kóshesindegi kóppáterli úıdiń turǵyndaryna úlestirilgen.