Almaty oblysynda kásipker aýylyna sport alańyn salyp berdi

TALDYQORǴAN. QazAqparat - Jerlesteriniń chempıon bolǵanyn qalaıtyn qaltaly azamat óz qarjysyna sport alańyn salyp berdi. Sport alańynyń ashylýyna Almaty oblysy ákiminiń birinshi orynbasary Aıdarbek Baıjanov qatysty,  dep habarlaıdy QazAqparat tilshisi.

Jeke kásipker Máýlen Shapanbaıuly Muqashev Muqyry aýylynda týǵan. Ol Elbasy maqalasynan bastaý alǵan «Týǵan jer» baǵdarlamasyna qoldaý retinde ári jerlesteriniń arasynan chempıon shyqsyn degen nıetpen sport alańyn salyp berdi. Aýyldaǵy sport nysanynda fýtbol, basketbol, voleıbol men tennıs alańdary bar. Fýtbol men voleıbol alańy 42/22 metr, basketbol men tennıs alańy 30/22 metrdi quraıdy. Munda ár turǵynnyń sportpen aınalysyp, sheberligin shyńdaýǵa múmkindigi bar.

Sport alyńynyń ashylý saltanaty barysynda oblys ákiminiń orynbasary Aıdarbek Baıjanov barsha aýyl turǵyndaryn, sportshylardy, jattyqtyrýshylar men barsha sportqumar jandardy quttyqtady. 

«Týǵan jerdiń ár túlegi qaı jerde, qandaı qyzmette júrse de, atameken-altyn besigin bir sát esten shyǵarmaı, oǵan máńgilik qaryzdarmyn dep esepteýi tıis. Óıtkeni, adam boıyndaǵy daryn, qabilet, tektilik syndy abzal qasıetter ana súti, áke qany, týǵan jerdiń topyraǵynan darıdy», - dedi jeke kásipker Máýlen Shapanbaıuly.
 

Aýyl turǵyndarynyń alǵysyna bólengen jany jomart azamatqa aýyl halqy qurmetpen tulpar mingizip, ıyǵyna zerli shapan japty.