Almaty oblysynda kásipker 10 otbasyǵa baspana syılady
«Qaıyrmdy ister marafony» jalpyulttyq aktsııasy aıasynda «Birlik AJA» JShS basshysy, balqashtyq Jandos Ábdijapparov atalmysh agrofırmada 20 jyldan astam eńbek etip kele jatqan aýyl turǵyndaryna baspana syılady. Atap aıtsaq, kópbalaly 2 otbasyna, úshinshi top múgedegi turatyn 1 otbasyna, barlyǵy 10 januıaǵa óz demeýshiligimen turǵyn úı kiltin tabystady.
Jalpy, yntymaǵy men birligi jarasqan aýyldyń jas kásipker balasy jasynan tórt túlik túrine etene jaqyn bolyp ósken. 2015 jyly «Birlik AJA» JShS quryp, búgin sharýashylyqtyń tasyn órge súırep keledi. Seriktestik mal tuqymyn kóbeıtý men asyldandyrýǵa kóp kóńil bóledi. Táýelsizdikpen túıdeı qurdas Jandos qaıyrymdylyq jasaýdy jany súıetin azamat. Ol 2020 jyly «Asyl júrek» nomınatsııasynyń ıegeri atanǵan.
«Osydan 3 jyl buryn 7 baspananyń kiltin aýyl turǵyndaryna tabystaǵan bolatynbyz. Mine, búgin mereke kúni taǵy qýanyshty jaǵdaı bolyp jatyr. Men Táýelsizdik qurdasy ári elimniń patrıoty retinde aýylymnyń kórkeıýine az da bolsa úlesimdi qosqym keledi. Jaqsylyq jasaý janyma qýanysh syılaıdy», - dep atap ótti «Birlik AJA» JShS dırektory Jandos Ábdijapparuly.
Aıta ketý kerek, Almaty oblysynda «Qaıyrmdy ister marafony» jalpyulttyq aktsııasy sheńberinde 600-den astam is-shara uıymdastyrylǵan.
«Almaty oblysynda 80 mln teńgege 8 myńnan astam otbasy azyq-túlik paketterin aldy. Bul shara odan ári de jalǵasatyn bolady. Qazir Almaty oblysy kóleminde 4 myńnan astam volonter bar. Olardyń barlyǵy jyl sońyna deıin osy marafonǵa jumyldyrylatyn bolady», - deıdi oblystyq Jastar saıasaty máseleleri jónindegi basqarma basshysy Eldar Saparov.
Táýelsizdiktiń 30 jyldyǵyna oraılastyrylyp bastaý alǵan «Qaıyrmdy ister marafony» óńirde áli de jalǵasyn tappaq.