Almaty oblysynda karantın: Dúken men dárihanadan basqanyń bári jabylady
Turǵyndar da syrtta sebepsiz júrýge bolmaıdy. Eger tártip saqtalmasa aıyppul salynady. Onymen qosa, demalys kúnderi qoǵamdyq kólikterdiń de jumysy toqtaıtyn boldy. Al bes kún buryn elimizde engizilgen qatań oqshaýlaý sharalary aımaqta az bolsa da nátıjesin berip jatyr. Óıtkeni ótken aptada vırýstyń taralýy 4,4 paıyz bolǵan bolsa, qazirgi ýaqytta kórsetkish 3,4 paıyzdy quraıdy.
«2020 jylǵy 11 jáne 12 shildede qoǵamdyq kóliktiń, sondaı-aq barlyq obektilerdiń qyzmetin toqtata turýdy qamtamasyz etý. Oblystyń kommýnaldyq qyzmetteri men ınfraqurylymdary (elektr energetıkalyq kompanııalar, sýmen jabdyqtaý/jylýmen jabdyqtaý, órtke qarsy jáne avarııalyq-qutqarý qyzmetteri, turǵyn úı qoryn basqarý salasyndaǵy qyzmetter (elektrıkter, santehnıka, aýlalar men úı-jaılardy jınaý, avarııalyq qyzmet, onyń ishinde lıftilerge qyzmet kórsetý), kósheler men úı-jaılardy jınaý, qoqys pen qaldyqtardy jınaý, óńdeý jáne kádege jaratý, dezınfektsııalyq qyzmetter, jol qozǵalysyn retteýmen tehnıkalyq quraldarynyń jumys isteýin qamtamasyz etetin uıymdar», - delingen Almaty oblysynyń bas memlekettik sanıtarlyq dárigeriniń orynbasarynyń búgin shyǵarǵan N20-shy qaýlysynda.