Almaty oblysynda Qarakóz, Sadyq jáne Sydyq atty úshem dúnıege keldi
12:30, 16 Naýryz 2023
QONAEV. QazAqparat - Almaty oblysynyń Qarasaı aýdanaralyq kópbeıindi aýrýhanasynda dúnıe esigin ashqan úshem úıine shyqty, dep habarlaıdy QazAqparat DSM baspasóz qyzmetine silteme jasap.
Osy perzenthanada eki ul men bir qyzdy dúnıege ákelgen Aqmaral Aıdar 29 jasynda kópbalaly ana atandy.
Aqmaraldy úıinde taǵy úsh bala kútip otyr, úlken uly 8 jasta.
Úshemniń úlkeni Qarakózdiń salmaǵy - 2460 gr, Sadyq - 2100 gr, Sydyq - 1820 gr.
Qarasaı aýdanaralyq kópbeıindi ana men bala densaýlyǵyn saqtaý aýrýhanasy dırektorynyń orynbasary Indıra Kabaeva áıeldiń júktilik kezinde qatań baqylaýda bolǵanyn aıtty.
«Úshem júktiliktiń 36-shy aptasynda dúnıege keldi. Úshemge júkti bolǵanda árqashan ana men sábılerge qaýip tónedi. Sondyqtan áıel búkil ýaqyt boıy baqylaýda boldy. Úshem kesar tiligi arqyly dúnıege keldi. Búgingi tańda olardyń densaýlyǵy jaqsy, jaǵdaıy birqalypty», - dedi Indıra Kabaeva.