Almaty oblysynda qańtar oqıǵasy kezinde 16 adam qaza tapty

NUR-SULTAN. QazAqparat – Qańtar oqıǵasy kezinde Almaty oblysynda 16 adam mert bolǵan. Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet basshysynyń orynbasary Eldos Qılymjanov aıtty, dep habarlaıdy QazAqparat tilshisi.

«Sonymen qatar, biz qaza tapqan adamdar týraly aqparatty mán-jaıdyń anyqtalýyna qaraı halyqqa jetkizip otyramyz. Buǵan deıin Qyzylorda, Atyraý, Shymkent jáne Taraz qalalaryndaǵy terrorıstik shabýyl týraly habarlaǵan bolatynbyz. Búgin men Almaty jáne Shyǵys Qazaqstan oblystaryna toqtalǵym keledi. Almaty oblysynda 16 adam kóz jumdy, onyń ishinde 5 quqyq qorǵaý organynyń qyzmetkeri bar. 6-19 qańtar aralyǵynda atalǵan óńirde terrorıstik qaýiptiń «qyzyl» deńgeıi saqtalyp, terrorızmge qarsy operatsııa júrgizilgenin eske salǵym keledi. Osy ýaqytta qarýly qylmyskerler quqyq qorǵaý organdarynyń qyzmetkerleriniń ómirine qaýip tóndirýdi jáne shabýyl jasaýdy jalǵastyrdy», - dedi E. Qılymjanov.

Ol osy kezeńde terrorızmge qarsy operatsııa júrgizilgenin, azamattardyń qozǵalysynyń erekshe tártibi bekitilip, avtokólikterge tekserý jasalǵanyn eske saldy.

«Naqty osy kezeńde, ıaǵnı 6-8 qańtar aralyǵynda azamattardyń qaza bolý faktileri tirkeldi. Onyń barlyǵy boıynsha tergeý júrip jatyr. Muqashevtiń ólimine ákep soqqan uryp-soǵý faktisi boıynsha tergeýmen arnaıy prokýrorlar aınalysýda. Osy is boıynsha sottyń sanktsııasymen quqyq qorǵaý organdarynyń 2 qyzmetkeri qamaýǵa alyndy», - dedi Bas prokýratýra ókili.

Budan buryn habarlanǵandaı, Qańtar oqıǵasy boıynsha tergeý organdarynyń is júrgizýinde 5 041 qylmystyq is bar.