Almaty oblysynda qaqaǵan qysta da dalada sýǵa shomylýǵa bolady
Termaldy sýdyń shıpalyq qasıeti de joq emes. Quramynda túrli mıneraldar men radon elementteri bar. Qaradala jazyǵynda jyl saıyn 70 myńǵa deıin týrıst kelip qaıtady. Negizinen Almaty qalasy men oblys turǵyndary.
«Bizdiń týǵan jerimizde osyndaı tamasha jerdiń baryna óte qýanyshtymyn. Almatydan 300 shaqyrymdaı ǵana jerde ornalasqan ystyq sýdyń shıpaly sýyna tántimin. Densaýlyqqa óte paıdaly. Osy sýǵa tússem sharshaǵanym birden basylady. Kóp adamdar bul jerdiń qasıetin bilmeı jatady. Sondyqtan halyqqa kóbirek nasıhattaý kerek. Mine qarańyzshy, qarashanyń qara sýyǵynda biz dalada ystyq sýǵa túsip, keremet demalyp jatyrmyz. Bul ystyq sý ásirese býyn aýrýlaryna óte tamasha. Sony kóbi bile bermeıdi», - deıdi Almaty qalasynyń turǵyny Baqyt Merekenqyzy.
Qaradala eldi-mekeninde halyqqa qyzmet kórsetetin demalys oryndary óte kóp. Qyzmet baǵasy sapasyna qaraı óse beredi. Al basseınder dalada da, ǵımarat ishinde de ornalasqan. Ondaǵy ystyq sýdyń temperatýrasy 32- 49 gradýsqa deıin barady. Jergilikti turǵyndar, keı demalys oryndarynda ystyq sý 56 gradýsqa deıingi temperatýrada shyǵatynyn aıtady. Sondyqtan týrıster osy jaıtqa mán berip, demalys oryndaryna barǵanda, sýdyń temperatýrasyn surap alýlaryna bolady.
«Ystyq sýdaǵy demalys oryndarynyń baǵasy árqalaı. Eń arzany adam basyna 8 myń teńgeden bastalady. Onyń ishine tańǵy as, sýǵa túsý, jatyn oryn kiredi. Eger qalasańyz adam basyna 25 myń teńgelik jerler de bar. Kún sýytqan saıyn Uıǵyr aýdanyndaǵy ystyq sýdyń maýsymy qyza túsedi. Ásirese, almatylyqtar qysqy maýsymda osy jaqqa qaraı aǵylady. Halyqtyń legi jyldan-jylǵa artýda», - «Qazaq Travel» kompanııasynyń basshysy Jandos Nurıev.
Qaradala jazyǵynyń bas jospary jyl sońyna deıin daıyn bolmaq. Týrıstik aımaqta áli de sheshimin tappaǵan máseleler jetkilikti. Aýyz sý jáne káriz júıesin retke keltirý qajet. Qatty turmystyq qaldyqtar tógetin oryn joq. Ystyq sýdyń medıtsınalyq, emdik ádistemelerin jetildirýdi qajet etedi. Osy jáne basqa da máseleler týrıstik maýsymnyń ashylýy barysynda kóterildi.
«Investor tabyldy. Jańa jyldan keıin ınvestorlar kelip, qandaı baǵytta jumystar isteıtindigi talqylanady», -dedi Uıǵyr aýdany ákiminiń orynbasary Álimjan Hýsýrov.
Jańa demalys oryndary ashylyp, ystyq sýdyń múmkindikterin tolyq paıdalansa týrıster sanyn bir jylda 1 mln adamǵa jetkizýge ábden bolady, deıdi sala mamandary.
Bul joly Uıǵyr aýdanyndaǵy ystyq sýda BAQ ókilderi men aýdan ákimderiniń baspasóz hatshylary arasynda arnaıy semınar uıymdastyrylyp, qonaqtar tek bilimderin ǵana shyńdap qoımaı, ystyq sýda demalyp, termaldy sýdyń qasıetin sezinip, tanysyp qaıtty.
«Jetisý-jaqut mekenim» atty blog-týrdyń maqsaty osy jerge jýrnalısterdi, blogerlardy ózge de sala mamandaryn ákelip, bizdiń týrızm salasynyń áleýetin kórsetý. Nasıhattaý. Búginde bul jerdiń bolashaǵy óte zor dep sanaımyz. Sondyqtan Jetisýdyń taǵy bir keremet jaquty sanalatyn ystyq sýdy brendke aınaldyrsaq, búkil álem tanysa degen maqsatymyz bar. Biz uıymdastyrǵan shara barysynda jalpy áleýmettik jelidegi arnaıy paraqshalardy qalaı júrgizý kerek, kásibı salada jetistikke jetý jóninde Serik Mámbetov, Almas Toqabaev syndy mamandar arnaıy dáris ótkizdi», - dedi «Jetisý Medıa» ortalyǵynyń dırektory Janna Arynbekova.
Bloger, stsenarıst Almas Toqabaev Almaty oblysy ákimdiginiń aýdandarynda jumys isteıtin baspasóz hatshylaryna aqparatty qysqa jazýǵa keńes berdi. Sebebi, onyń paıymynsha, áleýmettik jelide otyratyn adamdar qazir qysqa aqparatty ǵana qabyldaýǵa daǵdylanǵan.