Almaty oblysynda gazǵa qosylý quny 2 ese arzandady
Búgin Úkimet otyrysynda Premer-Mınıstr Álıhan Smaıylov óńir basshysynan: «Oblys halqynan gazǵa qosylý quny joǵary degen shaǵymdar túsýde. Bul Qarasaı, Talǵar, Eńbkshiqazaq aýdandarynda. Osy máseleni sheshý boıynsha qandaı is-sharalar qabyldaısyzdar?», - dep suraǵan edi.
Marat Sultanǵazıevtyń aıtýynsha, oblystaǵy 384 eldi mekenniń 294-i gazdandyrýǵa jatady. Onyń 147-si, ıaǵnı 51 paıyzdan astamy gazandyrylǵan. 1 mln 107 myń adam nemese 73,5 paıyzy gazǵa qol jetkizdi.
«Memlekettik-jekeshelik áriptestik aıasynda 2022 jyly 2,7 mlrd teńgege 4 joba iske asyryldy. Ótken jyly jeke ınvestorlardyń esebinen júrgizilgen qurylys jumystarynyń arqasynda 129 eldi meken gazdandyryldy. Búginde qoldanystaǵy zańnamaǵa sáıkes, jeke kásipkerlik sýbektileri óndiretin taýarlarǵa, jumystarǵa, kórsetiletin qyzmetterge baǵany derbes belgilep otyr. Óıtkeni, baǵa Úkimet tarapynan retteýge jatpaıdy. Bul rette azamattardy gazǵa qosý baǵasyn tómendetý maqsatynda ákimdik oblys prokýratýrasymen jáne gazǵa qosý qyzmetin júzege asyratyn uıymdarmen birlesip, gazǵa qosý baǵasyn 350 myń teńge sheginde belgileý týraly kelissózder júrgizdi. 10 mekeme kelisimin berdi. Olardyń naryqta 35 paıyzǵa deıin úlesi bar», - dedi oblys basshysy.
Osy rette Úkimet basshysy «Almaty óńirinde gazǵa qosylý baǵasynyń 2 esege arzandady ma?», - dep naqtylaý suraǵyn qoıdy.
«Iá, arzandady desek te bolady», - dep jaýap berdi óńir basshysy.