Almaty oblysynda esirtki jasaıtyndar 18 mln teńgege ferma satyp alǵan

ASTANA. QazAqparat – Almaty oblysynyń polıtseıleri Іle aýdany aýmaǵynda iri kólemdegi esirtki jasaıtyn zerthanany anyqtap, jolyn kesti. Bul týraly Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Almaty oblysynda polıtseıler esirtkiniń aýqymdy óndirisin toqtatty. Atap aıtqanda, Іle aýdanynyń esirtki qylmysyna qarsy is-qımyl departamenti qyzmetkerleri Almaty oblysyndaǵy áriptesterimen birlesip esirtki zerthanasyn qurmaq bolǵandardyń jolyn kesti. Mejrechensk kenti mańyndaǵy qurylys polıtseılerdiń nazaryn aýdardy. Anyqtalǵandaı, belgisiz bireýler 1 gektar jerdi taspen qorshap, aýyl sharýashylyǵyna qatysy joq jabdyqtar ákelip, transformatordy elektr jelisine qosqan. 20 kanıstrdi prekýrsorlarmen tasymaldaý kezinde polıtseıler eki jergilikti turǵyndy ustady», - dedi Shuǵyla Turlybek vedomstvoda onlaın ótken baspasóz máslıhatynda.

Ustalǵandardan psıhoaktıvti zattar tabylǵan.

«Atalǵan qurylys alańy buryn ferma bolǵan, keıin kúdiktilerdiń biri ony 18 mln teńgege satyp alǵan. Ýchaskeni bıik etip qorshap, kózden tasalaǵan jáne ýaqytsha baspana, monsha men garaj salǵan. Kúdiktiler syrt kózdi aldaý úshin mal ustaıtyn oryndardy da qarastyrǵan. Al esirtki jasap shyǵarýǵa arnalǵan bólek bólme bar bolyp shyqty. Eskirtki zerthanasynyń ishi tolyq jabdyqtalǵan», - deıdi ol.

Onyń aıtýynsha, kúdiktilerden esirtki óndirýge arnalǵan jabdyqtar men 1000 lıtrden astam prekýrsor tárkilendi. Sondaı-aq, atalǵan jaıt boıynsha qylmystyq is qozǵaldy.