Almaty oblysynda er adam meshit jamaǵatyn tonap kelgen

ALMATY OBLYSY. QazAqparat – Buryn sottalǵan jas jigit Almaty oblysynda meshitke kelýshilerdi tonap júrdi, dep habarlaıdy QazAqparat.

Oblystyq polıtsııanyń málimetinshe, aqpan aıynyń sońynan bastap Tuzdybastaý, Gúldala, Qyzyl tý jáne Panfılov kentterinde ornalasqan meshitterge kelýshi jamaǵattan ótinishter túse bastaǵan. Únemi maska taǵyp júrgen qylmyskerdiń áreketi kóshedegi beınebaqylaý kamerasyna túsip qalǵan. Búginde kúdiktiniń 16 urlyqqa qatysy bar ekeni rastaldy.

«Kúdikti aqsham namazy ýaqytyn paıdalanyp, meshitke kelýshilerdiń qolma-qol aqshasyn, uıaly telefondary men baǵaly zattaryn urlap júrdi. Ol meshit ishinde de, syrtynda da urlyq jasap, turaqqa qoıylǵan kólikterdi de ashty. Kólik áınekterin plastıkalyq negizi jáne bolat ushy bar arnaıy balǵamen syndyryp ashqan. Ustalǵan er adam buryn urlyq jasaǵany úshin jaýapqa tartylǵan Esik qalasynyń 25 jastaǵy turǵyny bolyp shyqty. Qazir onyń oblysta osyǵan uqsas basqa da urlyqtarǵa qatysy tekserilýde», - dep habarlady Talǵar aýdandyq polıtsııa bastyǵynyń orynbasary Andreı Býrıanskıı.

Qylmystyq is materıaldarynda aıǵaq dálel retinde tárkilengen beınejazbalar, urlanǵan telefondar men qylmys qarýy bar. Kúdikti er adam tergeý aıaqtalǵansha qamaýda bolady.