Almaty oblysynda eki meshit paıdalanýǵa berildi

TALDYQORǴAN. QazAqparat - Almaty oblysynyń Sarqan aýdanynda bir kúnde eki meshit paıdalanýǵa berildi. Ony salýǵa aýdannyń kásipkerleri men turǵyndary atsalysqan, dep habarlaıdy QazAqparat tilshisi.

Sarqan qalasyndaǵy ortalyq meshittiń ashylýyna halyq kóp jınaldy. Nysannyń qurylysy osydan 4 jyl buryn bastalǵan. Onyń salynýyna óńirdegi qaltaly azamattardan bastap, qarapaıym halyqqa deıin atsalysqan. Bul aýdan ortalyǵyndaǵy ekinshi meshit. Al jańa ekinshi meshit 500-den asa turǵyny bar Birlik aýylynda paıdalanýǵa berildi. Bul eldi mekende osyǵan deıin minájat etetin oryn bolmaǵan. Turǵyndar juma namazyna Sarqan qalasyna baratyn. Jańa meshit janynda as beretin oryn men shaǵyn namazhanalar da qarastyrylǵan. Jalpy, búginde oblysta 435 meshit bar. Onyń 20-sy osy Sarqan aýdanynda ornalasqan. Qazir Amanbókter aýylynda taǵy bir meshit boı kóterip jatyr. Keler jyly qoldanysqa berilmek.