Almaty oblysynda Bóribaı batyrǵa eskertkish ornatyldy
Aınalasyn abattandyrýǵa «Jumyspen qamtýdyń jol kartasy» aıasynda 52 mln teńge bólingen. Memorıaldyq keshenge bes tas qoıylyp, 300 batyrdyń esimi jazyldy. Mundaǵy maqsat – óskeleń urpaqty batyldyqqa baýlyp, otansúıgishtikke tárbıeleý.
Bóribaı batyr talaı qalmaq batyryn jekpe-jekte jeńip, bosyp ketken halyqtyń basyn biriktirip, Saryarqa tósinde Sarysý ózeni mańyna qonystandyrýymen tarıhta qaldy. Alaıda Keńes dáýirindegi solaqaı saıasat esimin atatpaı, batyr týraly málimetter maqsatty túrde joıylyp otyrdy. Sebebi 30-shy jyldary Aqsý halqy sol kezdegi bılikke qarsy Bóribaılap urandatyp kóterilis uıymdastyrǵan.
«Egemendik alǵannan keıin osy aqtańdaqtardyń ornyn qalpyna keltireıik, shyndyqty qaıtadan ornyna keltireıik degen maqsatpen biz osy sharýany qolǵa aldyq», - dedi eskertkishti ornatý keńesiniń tóraǵasy Berikbol Qasymov.
«Kóterip qolymyzǵa bóri baıraq, Jaýǵa shaptym Bóribaılap degenge keledi ǵoı. Bul urpaqqa aıbyn, erlikke ónege dep aıtar edim», - dedi Qazaqstan jazýshylar odaǵynyń tóraǵasy Ulyqbek Esdáýlet.