Almaty oblysynda azyq-túlik baǵasyn turaqtandyrý úshin 2 mlrd teńge bólinedi

TALDYQORǴAN. QazAqparat - Áleýmettik mańyzy bar azyq-túlik taýarlarynyń baǵasyn turaqtandyrý maqsatynda Almaty oblysynyń turaqtandyrý qoryna kásipkerlik sýbektilerine, saýda kásiporyndaryna (dúkenderge), sondaı-aq óńirdiń taýaróndirýshilerine jeńildetilgen zaemdar berý úshin 2 mlrd teńge kóleminde aqshalaı qarajat bólinedi, dep habarlaıdy QazAqparat tilshisi.

Kásipkerlerge zaemdy 2020 jyldyń ishinde berý josparlanyp otyr.

Almaty oblysy ákiminiń baspasóz qyzmetiniń aqparatyna sáıkes, «Jetisý» áleýmettik kásipkerlik korporatsııasy mamandandyrylǵan uıym retinde áleýmettik mańyzy bar azyq-túlik taýarlaryna baǵany turaqtandyrý tetigin iske asyratyn bolady.

Áleýmettik mańyzy bar azyq-túlik taýarlarynyń 19 ataýynan 17 túri nemese 90% Almaty oblysynyń aýmaǵynda óndiriledi. Taýarlardy satý oblysy ákimdiginiń qaýlysymen bekitilgen bólshek saýda baǵalarynyń shekti máninen tómen baǵalar nemese baǵa deńgeıinde júrgiziledi.

Jeńildetilgen zaemdar Almaty oblysynyń azyq-túlik taýarlarynyń turaqtandyrý qoryn basqarý jónindegi komıssııanyń sheshimimen beriledi. Komıssııa jergilikti atqarýshy organdar usynǵan kásipkerlik sýbektileri men saýda kásiporyndarynyń ótinimderin qaraıtyn bolady. Atalmysh nesıege kásipkerlik sýbektileri, saýda kásiporyndary áleýmettik mańyzy bar azyq-túlik taýarlardy belgilengen baǵa boıynsha satýdy júzege asyra bastaıdy.

Bul rette kásipkerlik sýbektileriniń menshiginde nemese jalǵa alý quqyǵynda saýda pavılondary, tamaq ónimderin saqtaýǵa arnalǵan qoıma ınfraqurylymy, bank kepildigi bolýy kerek jáne Komıssııanyń basqa da talaptaryna sáıkes kelýi tıis.

Almaty oblysynyń taýar óndirýshileri úshin jeńildetilgen qarjylandyrý áleýmettik mańyzy bar taýarlar baǵasyn ustap turý jáne óndirý úshin beriletin bolady. Bul sharalar forvardtyq kelisim sharttar túri boıynsha júrgiziledi.