Almaty oblysynda aıaq-kıim tigetin tseh ashyldy

TALDYQORǴAN.QazAqparat - Almaty oblysynyń Kerbulaq aýdanynda Tuńǵysh Prezıdent kúnine oraı aıaq-kıim tigetin  tseh ashyldy. Saryózektegi shaǵyn kásiporyn memlekettik baǵdarlamanyń qoldaýymen  júzege asty, dep habarlaıdy QazAqparat tilshisi.

Ekinshi toptaǵy múgedek Ashat Talǵarbaev «Bıznestiń jol kartasy - 2020» baǵdarlamasy arqyly 1,5 mln teńge grantqa ıe bolǵan. Bul qarajatqa qajetti qural-jabdyqtar satyp alyp, kásibin bastap ketti. Sonymen qatar ol ózi sııaqty múmkindigi shekteýli tórt azamatty jumyspen qamtydy. Jospar boıynsha, tsehta aıyna 40 jup aıaq-kıim tigiledi jáne bul zattar taza bylǵarydan jasalynady. Baǵasy da qarapaıym halyq úshin qoljetimdi bolmaq.

Aıta ketý kerek, kásibin jańadan bastaǵan Ashat Talǵarbaev týa bitti sóıleý qabiletinen aıyrylǵan. Ol ózi sııaqty azamattardy jumyspen qamtyp otyr. Olarǵa arnaıy sýrdo aýdarmashy qyzmet kórsetedi.

Kerbulaq aýdanynda  shaǵyn tsehpen qatar, sý júıesi de jańardy. Endi Shubar aýylynyń halqy aýyz sýdan taryqpaıtyn bolady. Sonymen qatar  aýdannyń ortalyǵyndaǵy bir  kóshege jańa  ataý berildi. Endi Saryózektegi jańa shaǵyn aýdan  Abylaı hannyń shóberesi Tezek tóreniń atymen atalady.