Almaty oblysynda aýyl turǵyndary jalǵyz qudyqtan sý iship otyr

TALDYQORǴAN. QazAqparat - Almaty oblysy Qaratal aýdanyna qarasty Kópbirlik aýylynyń turǵyndary aýyz sýdy aýyl shetindegi qudyqtan alyp otyr. Alaıda, aýylǵa 2012 jyly ortalyqtandyrylǵan sý júıesi júrgizilgen bolatyn, dep habarlaıdy QazAqparat tilshisi.

Bul eldi mekende 100-ge tarta tútin bar. Ortalyqtandyrylǵan sý júıesi barlyq úıge tartylǵan. Biraq «ondaǵy sý ishýge jaramsyz» deıdi aýyl turǵyndary.

Olardyń aıtýynsha, sýdyń quramynda tuz kóp. Tuzdy sý temir qubyrlardy shiritip, ydystardyń túbin tesip jatqanyn kórgen halyq bul sýdy múldem ishpeıdi.

Olarǵa aýyl shetindegi qudyqtan shyǵatyn tuşy sýdy tasyp ishken qaýipsiz.

«Aýylda tuşy sý qory bar. Sol jerge aparmaı, munarany jaqyn mańdaǵy tuzdy kóldiń janynan salǵan. Tuzdy kól aýyldan 300-400 metr jerde», - deıdi aýyl turǵyny Nurlan Shalbaev.

«Sý júıesi 2012 jyly tartylǵan. Sodan beri jyry bitpeı jatyr. Sý ishýge jaramsyz» - deıdi aýyl turǵyny Dıdar Baıǵojanov.

Al Qaratal aýdanynyń ákimdigi bul máselege keler jyly bir-aq kirispek. Onda da eń aldymen jobasyn jasap, al jóndeý jumystaryn 2022 jylǵa josparlap otyr.

«Jobalyq qujattaryn daıyndaýǵa 15 mln jumsalady dep josparlap otyrmyz. Jobany jasaǵan jaǵdaıda sý júıesiniń qurylysy 2022 jyly júrgiziledi. Ol qarjynyń bólinýine baılanysty», - deıdi aýdan ákiminiń orynbasary Ermek Ápekov.

Turǵyndar sondaı-aq sýdyń baǵasy óte qymbat deıdi. Qazirgi tańda ár tekshe metrine 500 teńge tóleıdi.

Al sý baǵasyn qymbattatyp otyrǵan - aşy sýdy tushytatyn qondyrǵy. Onyń jumysyna qosymsha elektr qýaty men aı saıyn aýystyrylatyn súzgishter qajet.