Almaty oblysynda aýyl maldary belgisiz indetke shaldyqqan
Eldi meken halqy indet 15-20 kún buryn bastalǵanyn, jáne oǵan jergilikti bılik eshqandaı shara qoldanbaı jatqanyn alǵa tartýda. Aýyldaǵy aǵaıyn qorasyndaǵy sıyry aýsyl dertin juqtyrdy dep shýlasa, mal dárigerleri «vırýsty stomatıt» degen boljam jasap otyr. Degenmen órqýsaqtyqtardyń qazirdiń ózinde 10 shaqty maly qyrylyp qalǵan. Aýyl syrtyna ádette 185 bas iri qara jaıylymǵa shyqsa, osy kúni tek 80-nen astamy ǵana tabynǵa qosylady. Qalǵany qorada baılaýly tur. Sebebi olardyń bári indet juqtyrǵan. Malǵa beretin jem-shóp te taýsylǵanyn aıtyp, halyq shyryldap otyr.
«4 kúnniń ishinde 15 myń teńge ketti. Al qalǵan qarajatty qaıdan tabamyz. Mamandar búgin ǵana keldi. Ózderi mynany kórip, jıirkenip, ketip qaldy. Tipti bolmasa myna maldy óltirip, kómse. Aýyrǵan kezde sileıip turyp qalady. Odan aýzynan bolar - bolmas silekeı aǵady. Tildiń qabyqtary túsip qaldy. Tańdaıy ol túsip jatyr. Shynymdy aıtsam, men qorqamyn. Mynaý juqpaly aýrý bolady ma», degen úreıin Órqýsaq aýylynyń turǵyny Baqytgúl Qondybaeva jetkizdi.
Aýdandyq veterınarııa bóliminiń mamandary byltyr aýyl maly barlyq indetke qarsy egilgen dep aqtalyp álek. Al maldyń naqty dıagnozy arnaıy zerthanada ǵana belgili bolady, deıdi veterınarııa bóliminiń basshysy Nurlan Beketaev. 4 jyl buryn el-jurtym dep kelgen Sátaı Jańylsynnyń buzaýy men qunajyny birinen soń biri óldi. Malmen ǵana jan baǵyp otyrǵan otbasy úshin bul úlken shyǵyn. Belgisiz indet juqtyrǵan maldarǵa ótemaqy tólenedi me, ol jaǵy belgisiz.