Almaty oblysynda aýyl halqy memlekettik qyzmetti onlaın ala bastady

TALDYQORǴAN. QazAqparat - Almaty oblysy halqynyń 70 paıyzy aýylda turady. Qazirgi jaǵdaıǵa baılanysty turǵyndar memlekettik qyzmetterdi E-GOV portaly arqyly alýda, dep habarlaıdy QazAqparat tilshisi.

Bir ǵana Kerbulaq aýdany turǵyndarynyń 87 paıyzy elektrondy-tsıfrly qoltańbamen qamtamasyz etilgen.

«Aýdan boıynsha kórsetilgen 230 myńnan astam memlekettik qyzmettiń 94 paıyzy elektrondy túrde júzege asqan. Al ózine qyzmet kórsetý buryshy arqyly 31 myńnan astam qyzmet kórsetilgen», - deıdi Kerbulaq aýdany ákimdiginiń apparat jetekshisi Aqnıet Tumataev.

Aýdandaǵy barlyq aýyldyq ákimdikter men mektepterde ózine qyzmet kórsetý buryshtary qoıylǵan. Úıinde kompıýteri joq aýyl turǵyny qajetti qujattardy ózine qyzmet kórsetý buryshynan rásimdeı alady.

Saryózek aýylynda turatyn kópbalaly ana Almagúl Baıbolatovanyń aýyl ákimdigine kelip, memlekettik qyzmetterdi elektrondy túrde alyp júrgenine jarty jyldan asty. Aýyl turǵynynyń aıtýynsha memlekettik qyzmetterdi elektrondy túrde alǵannyń eshqandaı qıyndyǵy joq.

«Bir ret kórip alsańyz boldy. Ózimniń jeke kiltim bar. Sol kiltimmen kez kelgen mezgilde qajet qujattarymdy eshkimniń kómeginsiz ala berem», - deıdi bes balanyń anasy Almagúl Baıbolatova.