Almaty oblysynda Asqar Zabıkýlın atyndaǵy jas patrıottar klýby ashyldy

QONAEV. QazAqparat - Almaty oblysy Uıǵyr aýdanynyń Shonjy aýylynda Astanada birneshe adamnyń ómirin qutqaryp qalǵan órt sóndirýshi Asqar Zabıkýlın atyndaǵy «Jas órt sóndirýshiler» áskerı-patrıottyq klýby ashyldy. QazAqparat bul týraly óńirlik Tótenshe jaǵdaılar departamentiniń baspasóz qyzmetine silteme jasap habarlaıdy.

Saltanatty sharaǵa batyrdyń jubaıy, týystary men dostary qatysty.

Klýbty ashýdyń maqsaty – óskeleń urpaqty azamattyq-patrıottyq turǵysynda tárbıeleý. Bolashaqta áskerı-patrıottyq klýbty tolyqqandy beıindi synyp retinde qalyptastyrý josparlanýda.

Sharanyń ashylý rásiminde Tótenshe jaǵdaılar mınıstri ıÝrıı Ilınniń quttyqtaýynyń vıdeotranslıatsııasy jasaldy. Vedomstvo basshysy Almaty oblysy Bilim basqarmasynyń qyzmetkerlerine, Abaı atyndaǵy mektep-gımnazııanyń pedagogıkalyq quramyna, ata-analar ujymy men oqýshylarǵa óskeleń urpaqty tárbıeleý máselelerinde atqaryp otyrǵan jumystary úshin zor alǵys bildirip, jańa jetistikter tiledi. Sondaı-aq balalardyń elimizdiń laıyqty azamattary atanýyna tilektestigin jetkizdi.

Budan bólek, birqatar ustazdar men oblystyq Bilim basqarmasynyń laýazymdy tulǵalaryna TJ mınıstriniń alǵys hattary tabys etildi.
«Jas órt sóndirýshiler» áskerı-patrıottyq klýbynyń 8 «A» synyp oqýshylarymen «Beıbit kúnniń batyry» taqyrybynda tárbıe saǵaty ótkizildi.
Іs-shara barysynda jas órt sóndirýshiler ant qabyldap, Asqar Zabıkýlınge arnalǵan «Dańq buryshynyń» saltanatty ashylý rásimi ótti.

Aıta keteıik, keshe Astanadaǵy saıabaqta A.Zabıkýlınge estelik taqta ornatylǵan bolatyn.
2022 jyldyń qarashasynda elordada kópqabatty úılerdiń birinde órt bolyp, 3 adam, onyń ishinde 1 bala aýrýhanaǵa tústi. Qutqarý jumystaryna qatysqan órt sóndirýshi Asqar Zabıkýlın denesiniń 80% jýyq bóligin kúıik shalyp, ol №1 kópbeıindi qalalyq aýrýhanaǵa jetkizildi. Dárigerler onyń ómiri úshin birneshe kún kúresti, biraq ol 20 qarashada aýrýhanada kóz jumdy.

Qyzmettik boryshyn oryndaý jáne adamdar ómirin qutqarý kezinde kórsetken erligi men óz isine berilgendigi úshin, azamattyq qorǵaý kapıtany Asqar Serikuly Zabıkýlın І dárejeli «Aıbyn» memlekettik nagradasymen marapattaldy.