Almaty oblysynda «Ashyq» jobasyna 740 nysan engizildi

TALDYQORǴAN.QazAqparat - Almaty oblysynyń basseınderi, lotereıa klýbtary jáne týrızm nysandary «Ashyq» jobasyna qosyldy. Óńirde barlyǵy 740 bıznes obekt qosymshany óz qyzmetine engizip otyr, - dep habarlaıdy QazAqparat tilshisi.

Almaty oblystyq kásipkerler palatasynyń dırektory Áset Shaıahmetovtyń aıtýynsha, 740 nysannyń 616-sy joba qatysýshy, 124-i synaq rejıminde jumys isteıdi.

«Osy aptadan bastap joba boıynsha birqatar qoǵamdyq tamaqtandyrý ortalyqtary, týrıstik nysandar, basseınder, sonymen birge, «Azamattarǵa arnalǵan úkimet» memlekettik korporatsııasynyń fılıaldary, Taldyqorǵan qalasynyń ákimdigi men áýejaıy jumys isteı bastady. Tsıfrlyq platformaǵa týrızm, mádenıet, sport jáne shıpajaı-kýrorttyq maqsattaǵy nysandar, demalys úıleri belsendi túrde qosylýda. Qazir kelýshiler men mekeme qyzmetkerlerine yńǵaıly bolý úshin «Ashyq» qosymshasyn ǵana emes, sonymen qatar Aitu qosymshasyn, Kaspi.kz jáne Halyk Homebank bank qosymshalaryn da qoldanýǵa bolady», - deıdi Almaty oblysy Kásipkerler palatasynyń dırektory Áset Shaıahmetov.

Oblystyq sanıtarlyq-epıdemıologııalyq baqylaý departamentinen atap ótkendeı, qosymshanyń arqasynda Almaty oblysynda 103 azamattan «qyzyl» jáne «sary» mártebe anyqtalǵan. Sonyń ishinde Taldyqorǵan qalasynda 57 «sary» jáne 36 «qyzyl» mártebesin tasymaldaýshy, Panfılov aýdanynda bir «qyzyl» jáne úsh «sary» mártebesin tasymaldaýshy, Eskeldi aýdanynda bir «qyzyl» jáne eki «sary», Qarasaı aýdanynda bir «qyzyl», bir «sary» jáne Eńbekshiqazaq aýdanynda bir «sary» mártbesi bar adam anyqtaldy.