Almaty oblysynda ArtSport arqyly para alǵan sheneýnik aıyppulmen qutyldy

QONAEV. QazAqparat - Almaty oblysynda ArtSport memlekettik baǵdarlamasy arqyly para alǵan sheneýnik pen kásipker iri kólemde aıyppul tóleýge mindetteldi, dep habarlaıdy QazAqparat tilshisi.

«9 jeltoqsanda sot úkimimen dene shynyqtyrý jáne sport basqarmasynyń bas mamany ArtSport baǵdarlamasy boıynsha jan basyna shaqqandaǵy qarjylandyrýdyń memlekettik tapsyrysyna qatysý úshin ónim berýshiniń ótinimin oń qaraǵany úshin kásipkerden 400 000 teńge kóleminde para alǵany úshin kináli dep tanylyp, oǵan 12 mln teńge kóleminde aıyppul (para somasynyń 30 eselengen mólsheri), al kásipkerge 800 myń teńge kóleminde aıyppul jazasy taǵaıyndaldy», - delingen Sybaılas jemqorlyqqa qarsy is-qımyl agenttigi Almaty oblysy boıynsha departamentiniń resmı habarlamasynda.

Memlekettik baǵdarlamaǵa keshendi tekserý júrgizgen antıkor baǵdarlamanyń ózge de bylyqtaryn ashyp kórsetti.

Máselen osy baǵdarlamaǵa qatysyp, qyzmet usynyp otyrǵandar oblystyń ártúrli aýdandarynda bir mezgilde qyzmet kórsetken.

Bul kórsetiletin qyzmetterdiń oryndalýyna kúmán keltiredi.

Máselen, Almaty oblysynda kásipker sporttyń 15 túri boıynsha memlekettik tapsyrysty jeńip alyp, araqashyqtyǵy 65 km bolatyn oblystyń eki aýdan ortalyǵynda ornalasqan (Іle aýdanynda, Ótegen batyr kentinde jáne Eńbekshiqazaq aýdanynda, Esik qalasy) dzıýdo jáne shahmat úshin S. atty jattyqtyrýshyny jaldaǵan.

«Sondaı-aq, taǵy bir kásipker B. atty jattyqtyrýshyny jaldaıdy, qujatqa sáıkes Uzynaǵash aýylynda (Jambyl aýdany) jáne Esik qalasynda (Talǵar aýdany) ol kórkem gımnastıkadan sabaq beredi. Olardyń arasyndaǵy qashyqtyq 100 km-den asady»,- delingen vedomstvonyń habarlamasynda.

Sonymen qatar, Almaty oblysy kóshi-qon polıtsııasy basqarmasynyń derekteri boıynsha ArtSport platformasynda 552 birlik kóleminde JSN joq nemese derekterge sáıkes kelmeıtin ata-analar tirkelgen.

Memlekettik sporttyq tapsyrysty jan basyna shaqqandaǵy normatıvtik qarjylandyrýdyń aldyn ala esepteýinshe memleket naqty jumys jasamaıtyn 552 tulǵaǵa (1 qańtardan qazan aıyna deıin) 75 mln teńge somasynda bıýdjet qarajatyn tólegen (mádenıet jáne sport basqarmasynyń derekteri boıynsha ár balaǵa aı saıyn orta eseppen 13 600 teńge mólsherinde bıýdjet qarajaty kózdelgen).

Joǵaryda atalǵan barlyq faktiler sybaılas jemqorlyqqa qarsy qyzmettiń óndirisinde.

Aıta keteıik, ArtSport memlekettik baǵdarlamasyna Almaty oblysynda qatysýshylar sany kúrt ósip, bıýdjetten bólingen qarjy jetpeı, úıirmelerdiń aqshasy tólenbeı, sol úıirmelerdi ashqan kásipkerler shaǵymdanǵan bolatyn.

Kóp uzamaı keshendi tekserý júrgizilip, endi úıirme qojaıyndarynyń óziniń basy daýǵa qaldy.

Sebebi, balany JSN boıynsha tirkep, shyn mánisinde ol úıirmege qatyspady degen kúdik basym.