Almaty oblysynda Afrıka balyqtary jersindirilýde

TALDYQORǴAN. QazAqparat - Almaty oblysynyń Uıǵyr aýdanynda Afrıka balyqtary jersindirile bastady. Tılıapııa jáne afrıkalyq jaıyn osy aýdanda jer astynan shyǵatyn ystyq qaınarlarynda ósirilýde, dep habarlaıdy QazAqparat tilshisi.

2016 jyly iske qosylǵan sharýashylyq aıyna 5 tonna balyq etin oblys aýmaǵyna jáne Almaty qalasyna ótkizip keledi. Atalǵan tirshilik ıesi  28-29 gradýs nólden joǵary temperatýrada emin-erkin ómir súredi. Sebebi tılıapııanyń negizgi otany Afrıka jáne tropıktik elder. Qazirgi sharýashylyqta 7 myń bas tılıapııa men 10 myń bas afrıka jaıyny ósirilýde. Bul balyqtardyń bir ereksheligi jarty jylda taýarly salmaǵyna jetip, satýǵa jaramdy bolady. Ekzotıkalyq balyq túrine suranys ta joǵary. Bıyl kásiporyn jylyna 60 tonna balyq óndirmek. Al keler jyly 300 tonnaǵa jetkizýdi josparlap otyr. Salystyrmaly túrde Qytaı elindegi balyq eksportynyń 50 paıyzy, Izraılde 40 paıyz osy tılıapııa qurap otyr.

«Basqa balyqtarǵa qaraǵanda tılıapııa ottegini da asa kóp qajet etpeıdi. 1 lıtr sýǵa 3 mg ottegi jetip jatyr. Dál osyndaı ortada bul balyqtar táýligine 3-4 gr salmaq qosyp otyrady» deıdi balyq ósirýshi Dáýren Rahımov.

Mamandardyń aıtýynsha bul balyqtyń ózge balyqtan dámi de, túsi de ózgeshe. Tipti keı elderde tılıapııany sý taýyǵy dep te ataıdy. Sebebi etiniń dámi taýyq etine jaqyn. Sondaı-aq qyltanaǵy da az.