Almaty oblysynda 900 myńǵa jýyq adam koronavırýsqa qarsy vaktsına aldy

TALDYQORǴAN. QazAqparat - Almaty oblysynyń ákimi Qanat Bozymbaev koronavırýsqa qarsy kúres jáne onyń aldyn alý máseleleri jóninde keńes ótkizdi. Jıynda indetpen kúreske daıyndyq, medıtsınalyq mekemelerdi dári-dármek, tósek-oryn, qural-jabdyqpen qamtý, turǵyndarǵa vaktsına egý máseleleri talqylandy, dep habarlaıdy QazAqparat tilshisi.

Keńes barysynda aıtylǵandaı, búgingi kúni algorıtmge sáıkes oblysta halyqty vaktsınatsııa boıynsha aýqymdy jumys júrgizilip jatyr.

Koronavırýsqa qarsy vaktsına egýge arnalǵan 318 egý pýnkti, 76 mobıldi brıgada, 17 jyljymaly medıtsınalyq keshen jumys isteıdi.

Búgingi kúnge 888 854 adam egilgen. 38 325 adamǵa revaktsınatsııa jasaldy. Pfizer vaktsınasy 27 615 jasóspirimge, 2193 júkti áıelge salyndy.

Degenmen vaktsına egý deńgeıi tómen aýdandar da bar.

Máselen, Talǵar aýdanynda – 50%, Panfılov aýdanynda - 62%, Uıǵyr aýdanynda – 63%, Qaratal aýdanynda - 65%, Taldyqorǵan qalasynda - 65%.

«Qaýipti keselden qorǵanýdyń jalǵyz joly – vaktsına alý. Odan basqa jol joq. Vaktsına saldyrǵan adam aýrýdy jeńil ótkeredi. Osyny halyqqa jaqsylap túsindirý kerek», - dedi Q.Bozymbaev.

Jıynda oblys ákimi aýdan, qala ákimderine vaktsına egý jumystaryn shıratýdy qatań tapsyrdy.

Oblystyq densaýlyq saqtaý basqarmasy koronavırýs ınfektsııasynyń omıkron jańa shtamyna qarsy is-sharalar josparyn daıyndaýy tıis.

Turǵyndar arasynda vaktsınanyń paıdasy týraly keń kólemdi túsindirý júrgizilip, «ASHYQ» jobasyn engizgen nysandar úshin bekitilgen sanıtarlyq-epıdemıologııalyq talaptardyń saqtalýyn qadaǵalaýshy monıtorıng tobynyń jumysyn aýdan, qalalarmen birlesip shırata túsý qajet.

Atap ótsek, búgingi kúni 386 adam statsıonarlyq em qabyldaýda, bir táýlikte aýrýhanalarǵa 19 adam tústi, 23 adam shyǵaryldy, tósek oryn sany – 1335, júktemesi – 28,9%.

Epıdemıologııalyq jaǵdaı kúrdelenetin bolsa, aýrýhana uıymdarynda tósek sany 6 myńǵa jetkizilip (A jospary), B josparyna kóshken jaǵdaıda aýrýhanalardan tys uıymdarda 4945 tósek qosymsha uıymdastyrylady, jalpy tósek-oryn qory 10945 bolady.

Oblysta qajetti dári-dármektiń eki aılyq qory bar.