Almaty oblysynda 9 aıda 712,4 myń sharshy metr turǵyn úı paıdalanýǵa berildi

TALDYQORǴAN. QazAqparat - Almaty oblysynda 9 aıda 712,4 myń sharshy metr turǵyn úı paıdalanýǵa berilip, ósim 7,6% qurady. Al jyldyq jospar – 938,8 myń sharshy metr. Bul jaıynda búgin Prezıdent Joldaýynyń óńirde oryndalý barysy týraly brıfıng ótkizgen Almaty oblysynyń ákimi Amandyq Batalov málim etti, - dep habarlaıdy QazAqparat tilshisi.

Óńir basshysynyń aıtýynsha, Elbasynyń «Nurly jer» baǵdarlamasy sheńberinde turǵyn úıler men ınjenerlik ınfraqurylymdardyń qurylysyna 38,3 mlrd teńge bólindi.

Jalpy oblysta barlyǵy 2843 páterlik 566 turǵyn úı salynýda, onyń 1020-sy kóp balaly otbasylaryna beriledi. 1533 otbasy «7-20-25», «Baqytty otbasy» jáne «Shańyraq 5-10-20» jeńildetilgen baǵdarlamalary boıynsha páter alady.

«Oblys ortalyǵy Taldyqorǵanda 670 úılik kottedj qalashyǵynyń qurylysy júrip jatyr. Bıylǵy jyly 345-in qoldanysqa beremiz. Munda mektep, balabaqsha, balalar alańdaryn salamyz», - dedi óńir basshysy.