Almaty oblysynda «7-20-25» baǵdarlamasymen 4-aq páter berilgen

TALDYQORǴAN. QazAqparat - Almaty oblysynda  «7-20-25» baǵdarlamasy aıasynda 4-aq páter berilgen. Bul jóninde óńir basshysy Amandyq Batalov Joldaýdy talqylaýǵa arnalǵan aktıv jıynynda aıtty, dep habarlaıdy QazAqparat  tilshisi.

«Oblysta shamamen 42 myń adam turǵyn úı jáne 152 myń adam jer ýchaskelerin alý úshin kezekte tur. «7-20-25» baǵdarlamasy bastaldy, alaıda áli kúnge deıin satyp alýshylardyń tolyq pýly qalyptaspaǵan. Ekinshi deńgeıli bankter somasy 849 mln teńgege 73 ótinim ǵana qabyldaǵan, onyń 53-i maquldanyp, 4-aq páter berilgen. Sol úshin jańa tapsyrma berdim - apta saıyn barlyq ákimder baǵdarlama qalaı júzege asyp jatqany jóninde málimet berip otyrasyzdar», - dedi Almaty oblysynyń ákimi Amandyq Batalov.

Baspana máselesin  sheshý úshin óńir basshysy «Nurly jer» baǵdarlamasy sheńberinde jaldamaly jáne nesıelik turǵyn úı kólemin ulǵaıtý qajettigin aıtyp, qaramaǵyndaǵylarǵa naqty mindetter júktedi.

«Oblys ákiminiń orynbasarlary L. Turlashovqa, A. Baıjanovqa turǵyn úı salý úshin jeke ınvestorlar tartý máselesin pysyqtaýdy, sondaı-aq jeńildetilgen ıpoteka boıynsha alǵashqy jarnany ishinara sýbsıdııalaý boıynsha usynys engizýdi tapsyramyn», - dedi óńir basshysy. 

Esterińizge sala keteıik, búgin Taldyqorǵanda Elbasy Joldaýyn talqylaýǵa arnalǵan aktıv jıyny ótti. Oǵan Almaty oblysynyń barlyq aýdan, qala ákimderi men basqarma basshylary qatysty. Jıynǵa Amandyq Batalov tóraǵalyq etti.