Almaty oblysynda 58 myńǵa jýyq balany tegin úıirmemen qamtýǵa qarajat joq – ákimdik

TALDYQORǴAN. QazAqparat - Almaty oblysynda Prezıdenttiń tapsyrmasymen ashylǵan tegin úıirmelerdiń bári jabylǵaly jatyr. Sebebi, oblystyq ákimdik olardy qarjylandyratyn aqsha joq deıdi. Al bul úıirmelerge 58 myńǵa jýyq bala baryp júrgen. Endi osy 1954 úıirmeni ashqan kásipkerlerdiń de, onda jumyspen qamtylǵan mamandardyń da, balalardyń da taǵdyry beımálim bolyp tur, dep habarlaıdy QazAqparat tilshisi.

Taldyqorǵanǵa Almaty oblysynyń ár aýdan, aýylynda úıirme ashqan jeke kásipkerler jınaldy.

Aıtýlarynsha, olar kásibin byltyr mamyr aıynda asha bastaǵan. Endi ashylǵanynan jabylǵany tez bolaıyn dep tur.

Sebebi, aqyly úıirmege balasyn berýge ata-analarda jaǵdaı joq deıdi. Balalardy tegin úıirmemen, mamandardy jumyspen qamtyǵan olar qalaısha Almaty oblysynyń ákimdigi Prezıdenttiń tapsyrmasyn oryndamaıdy dep narazy.

«Prezıdentimizdiń bastamasy qaıda qaldy? Osy balalardy oqytamyz dep daıarlanǵan úıdi, ony mektepke aınaldyrýdyń ózi de úlken eńbek ekeni nege esten shyǵyp ketti?», - deıdi Eńbekshiqazaq aýdanynyń turǵyny, úıirme basshysy Qyrǵaýyl Tákeıqyzy.

«Eskeldi aýdanynyń ortalyǵy Qarabulaqta tamyz aıynda balalardy tegin oqytý úıirmesin ashqanbyz. Qazirgi tańda bizde 36 úıirme istep tur. 1600-ge jýyq oqýshyny tegin oqýmen qamtamasyz etip jatyrmyz. Keshegi kúni bizge qarjylandyrý toqtady degen aqparat keldi. Endi budan keıin balalarǵa qalaı jetkizemiz? Balalardyń bolashaǵyna balta shabý ǵoı, bylaı qarasańyz», -deıdi Eskeldi aýdanynyń turǵyny, úıirme basshysy Bıbolsyn Jeksenbekuly.

«Ár qazaqtyń balasyna aıyna 12 myń teńge tólep, úıirmege oqytý negizi qıyn emes dep oılaımyn. Bir balaǵa 12 myń teńge tóleý Qazaqstannyń qolynan keledi», -deıdi Talǵar aýdanynyń turǵyny, úıirme basshysy Qýanysh Júzbaev.

Jınalǵandardy ákimdik ókilderi mádenıet úıine shaqyryp, úıirmelerdi qarjylandyrýǵa «oblysta qarajat joq» dep birden ashyp aıtty.

Almaty oblysynyń sheneýnikteri rasymen baǵdarlama Prezıdenttiń tapsyrmasymen byltyr mamyr aıynda bastalǵanyn, byltyr 48 myńnan asa bala tegin úıirmemen qamtylyp, oǵan 1,5 mlrd teńge aqsha bólinip, tolyq ıgerilgenin, al bıyl taǵy 2,4 mlrd teńge bólinip, ol aqsha túgesilgenin aıtty.

«Búkil osy 57 600 balanyń úıirmege barýyn qaıta jalǵastyrý úshin osy jylǵa 14 mlrd teńge qajet», -deıdi Almaty oblysy ákiminiń orynbasary Arslan Dándibaev.

«Biz tek qana qarjy tapshylyǵyna baılanysty qarjylandyrýdy toqtatyp jatyrmyz. Ary qaraı sizder istep júre beremiz deseńizder, ol - óz qaqylaryńyz», - dedi Almaty oblystyq mádenıet basqarmasynyń basshysy Márlen Kólbaev.

«Ata-analardyń aqy tóleýge jaǵdaıy joq. «Balalar jyly» degende qýanǵanymyz uzaqqa barmady ǵoı. Basqasy basqa, osy balalarǵa tegin jasasa dep suraımyz», - deıdi ata-ana Látıpa Tilálına.

Bir úıdiń ózinen 3-4 bala tegin úıirmege baratyn otbasylar kóp. Erteń olardyń ata-anasynyń úıirmege qarajat tóleýge shamasy kelmeıdi degen ata-ana da, úıirme ıeleri de Prezıdenttiń tapsyrmasy oryndalsyn deıdi.

Al oblys ákimdigi máseleni sheship, respýblıkadan qarajat suraý úshin Prezıdent ákimshiligi basshysynyń orynbasary Aıda Balaevamen jıyn ótkiziletinin jetkizdi.