Almaty oblysynda 500 adam jumys isteıtin iri zaýyt iske qosylady

TALDYQORǴAN. QazAqparat - Almaty oblysynyń Qapshaǵaı qalasynda kespeniń birneshe túrin shyǵaratyn zaýyt iske qosylady. «Arna» ındýstrııaldy aımaǵynda ornalasqan «Mareven Fýd Tıan-Shan» JShS-nyń azyq-túlik shyǵaratyn kásiporyny  bıyl maýsym aıynyń sońynda ashylady dep josparlanýda. Bul týraly búgin Almaty  oblysynyń  ákimi Amandyq Batalovtyń «Mareven Fýd Holdıngs» holdınginiń ókilderimen kezdesýi barysynda belgili boldy, dep habarlaıdy QazAqparat tilshisi.

Kezdesý barysynda ınvestorlar jobanyń júzege asyrylý barysy, jergilikti atqarýshy organmen birlesip sheshýge tıis birqatar máseleler týraly baıandady.

«Mareven Fýd Holdıngs» holdınginiń atqarýshy dırektory Mıshel Changtyń aıtýynsha, qazirgi kezde zaýyttyń óndiristik jáne ınjenerlik kesheni daıyn, ishki ınjenerlik kommýnıkatsııasy tolyǵymen júrgizilgen. Qajetti qural-jabdyqtar satyp alynyp, qoımada saqtaýly. 1-testilik jeli sáýir aıynda iske qosylyp, alǵashqy ónim shyǵarylady. Zaýyt naryqqa kásiporyn iske tolyq qosylǵannan keıin shyqpaq. Zaýyttyń maýsym aıynyń sońynda ashylady dep josparlanǵan.

Kezdesýde aıtylǵandaı, 2018 jylǵa 24 mlrd teńge bolatyn satylym kólemi belgilenip otyr. Zaýyt tez pisetin kespe, sorpa dámdeýishteri, makarondar - jalpy sany 15 túrli ónim shyǵaratyn bolady. Daıyn ónimniń 70 %-y kórshiles bes eline. Óndiris barysynda 5 ónim - un, tuz, karton jáne basqa da qazaqstandyq ónimder qoldanylady. Kásiporyn 500 adamdy turaqty jumys ornymen qamtıdy, onyń 90%-in jergilikti turǵyndar quraıdy. Investorlar zaýytqa kire beriske deıin jol tóseý, temir jolǵa shyǵatyn múmkindik jasaý qajettilikterin aıtty.  Oblys ákimi Amandyq Batalov bul máselelerdi sheshýdi baqylaýyna alatynyn jetkizdi.

Oblys ákiminiń orynbasary Jeńis Tuıaqovtyń aıtýynsha, qıyrshyq tas-qum tóseletin joldyń qurylysy naýryzda aıaqtalsa, aýa raıynyń qolaılylyǵyna qaraı sáýir-mamyr aılarynda asfalt tóseletin bolady. Temir jol máselesi de jyl sońyna deıin sheshimin tappaq. Zaýyt Qapshaǵaı qalasyndaǵy gaz jelisine qosylady.

 «Bizdiń oblystyń aýmaǵynda osyndaı iri ınvestıtsııalyq jobanyń júzege asyrylyp jatqanyna qýanyshtymyn. Bul kásiporyn óz kezeginde oblystyń azyq-túlik óndirisine óziniń úlken úlesin qosatyn bolady. Eń bastysy, zaýyt 500 turaqty jumys ornyn qura otyryp, jergilikti turǵyndardy jumyspen qamtıdy.  Oǵan qosa ónim ózimizdiń otandyq unnan daıyndalyp, daıyn ónim «Qazaqstanda jasalǵan» degen belgimen eksportqa shyǵarylatyn bolady», - dedi  kezdesýdi qorytyndylaǵan oblys ákimi A. Batalov.