Almaty oblysynda 422 synyp karantınge jabyldy
«2021 jyldyń 1-20 qyrkúıek aralyǵynda Almaty oblysy boıynsha oqýshylar arasynda koronavırýs ınfektsııasymen syrqattanýdyń 675 jaǵdaıy tirkeldi. Onyń ishinde 215 jaǵdaı jazǵy demalys kezinde, 444 jaǵdaı oflaın oqytý kezinde jáne 16 jaǵdaı onlaın oqytýda anyqtalǵan. Oblystyń 190 mektebiniń 422-synyptaryna karantın engizý týraly 366 qaýly shyǵaryldy jáne 6281 oqýshy qashyqtyqtan oqytý nysanyna aýystyryldy»,- delingen Almaty oblystyq sanıtarııalyq-epıdemıologııalyq baqylaý departamentiniń baspasóz qyzmeti taratqan habarlamada.
Vedomstvonyń aqparatyna sáıkes, muǵalimder arasynda 103 muǵalim indetti juqtyrǵan.
«2021 jyldyń 1-20 qyrkúıek aralyǵynda oblys boıynsha KVI-men aýyrǵan muǵalimderdiń 103 jaǵdaıy tirkeldi. Onyń ishinde 32 pedagog jazǵy demalys kezinde aýyryp qalǵan.
Óńirlerdegi sanıtarlyq-epıdemıologııalyq baqylaý basqarmalary pedagogtar, oqýshylar, stýdentter jáne tehnıkalyq personal arasynda syrqattanýshylyqtyń kúndelikti monıtorıngin júrgizedi»,- dep tolyqtyrdy atalǵan vedomstvonyń baspasóz qyzmetinen.