Almaty oblysynda 42 myń adam úı alý úshin qarajat jınap jatyr - TÚQJB

ASTANA. QazAqparat - Oblystaǵy úıler «Jeke turǵyn úı qurylysyn damytý» baǵdarlamasynyń pılottyq jobasy aıasynda salynady, dep habarlaıdy banktiń baspasóz qyzmeti.

Kottedj qalashyǵynyń jalpy aýmaǵy 6 myń sharshy metrdi quraıdy. Nysandar jyl sońyna deıin paıdalanýǵa beriledi dep josparlanýda.

Qurylys jumystaryn uıymdastyrý, ınjenerlik kommýnıkatsııalardy tartý máselelerine oblystyq ákimdik jaýap beredi, al daıyn úılerdi jeńildikti mólsherleme boıynsha satyp alýǵa TÚQJB («Báıterek» holdınginiń enshiles uıymy) kómektesedi. «Qazaqstannyń turǵyn úı qurylys jınaq banki» AQ basqarma tóraıymy Lıazzat Ibragımova men Almaty oblysynyń ákimi Amandyq Batalov búgin atalǵan másele boıynsha kelisimge kelip, yntymaqtastyq týraly memorandýmǵa qol qoıdy.

«Aımaqta 26 000 adam jer telimderin alý kezeginde tur. Bul - úı jaǵdaıyn jaqsartqysy keletin aýyl turǵyndary, dárigerler, muǵalimder, bıýdjet salasynyń qyzmetkerleri. Barlyǵy da jeke úıim bolsa, keń úıde tursam deıdi. «Nurly jer» baǵdarlamasy mundaı múmkindikti usynyp otyr. Jaqyn arada olar zań boıynsha ózderine tıesili 10 sotyq jerden bólek 1 sharshy metriniń quny 120 000 teńge bolatyn jaıly kottedjge de ıe bolady», - dep túsindirdi Lıazzat Ibragımova.

Memorandýmǵa qol qoıylǵan soń Turǵyn úı qurylys jınaq bankiniń basshysy «Nurly jol» baǵdarlamasynyń aıasynda jeke baspanaǵa qol jetkizgen jandarǵa úıdiń kiltin tapsyrdy. 168 páterden turatyn úı Taldyqorǵannyń ońtústik-batysyndaǵy jańa aýdanda ornalasqan. Páterler ákimdikte kezekte turǵandarǵa da, bank salymshylaryna da 1 sharshy metri úshin 140 000 teńgeden berildi.

«Buryn men aqsha jınap, úı satyp alý múmkin emes dep oılaıtynmyn. Biraq shotymda 1 mıllıon 700 myń teńgeniń basy quralǵanda, qýattanyp kettim. Bul páter baǵasynyń 30%-y boldy. Páter satyp alýshylar pýlyna qatysý úshin ótinish berip, ótip kettim. Jetpeıtin somaǵa zaem aldym. Endi alǵashqy bes jyl boıy 37 000 teńgeden tólep turamyn, osydan soń tólem somasy azaıatyn bolady», - deıdi TÚQJB salymshysy Baqyt Ahmetova.

Jyl sońyna deıin Almaty oblysynda taǵy 672 otbasy jańa úıge kóship kire alady. Aımaqta 6 úı paıdalanýǵa beriledi dep josparlanýda, onyń tórteýi Taldyqorǵanda, qalǵan ekeýi Qaskeleń men Іle aýdanyndaǵy Ótegen batyr kentinde ornalasqan.

Jalpy alǵanda Almaty oblysynda 42 000 adam úı alý úshin qarajat jınap jatyr.