Almaty oblysynda 300 oryndyq jańa mektep ashyldy

ASTANA. QazAqparat - Qarasaı aýdany, Úshterek aýylynda jańadan 300 oryndyq mektep ashyldy. Bul bilim mekemesi «Nurly jol» baǵdarlamasy boıynsha salynyp, onyń qurylysyna Ulttyq qor men jergilikti bıýdjetten 897 mln teńge bólindi. Mekteptiń ashylý saltanatyna oblys ákiminiń orynbasary Ǵalymjan Ábdiraıymov pen aýdan ákimi Mahabbat Bıgeldıev qatysty, dep habarlaıdy oblys ákimdiginiń baspasóz qyzmeti.

Mektep dırektory Anar Aıdymbaevanyń aıtýynsha, mektepte balalardyń ozat oqyp, jaqsy tárbıe alýyna barlyq jaǵdaı jasalǵan. Munda 4 lıngafondy-mýltımedııalyq kabınet, fızıka, hımııa, bıologııa, ınformatıka, sportzal, sheberhana, 100 oryndyq ashana, 72 oryndyq májilis zaly, 104 kompıýtermen jabdyqtalǵan kitaphana bar.

Oblystyq bilim basqarmasynyń málimeti boıynsha, Úshterek aýylynda buǵan deıin tek bastaýysh mektep bolǵan. Onda balalar úsh aýysymmen oqytylyp, orta jáne joǵary synyp oqýshylary Úshqońyr aýylyna qatynap oqýǵa májbúr bolatyn. Endi aýyl balalary syrtqa sabylmaı, Úshterektegi salynǵan jańa mektepte oqıtyn boldy.
 

Bilim berý mekemesiniń jalpy alańy 5 236 sharshy metr, qurylys jumystaryn «Dáýlet-Serpin 603» JShS 2015 jyldyń mamyr aıynda bastaǵan.