Almaty oblysynda 225 myń adam Pfizer vaktsınasymen qamtylady

TALDYQORǴAN. QazAqparat - Almaty oblysynda 22 qarashadan revaktsınatsııalaý kýrsy bastaý aldy. Búgingi kúnge 333 adam úshinshi ret ekpe saldyrdy. Olardyń 274-i medıtsına qyzmetkeri bolsa, 7-eýi muǵalim. Bul týraly «Jetisy Media» alańynda ótken baspasóz máslıhatynda málim boldy, dep habarlaıdy QazAqparat tilshisi.

Vırýsqa qarsy ımýndyq júıeni kúsheıtýge arnalǵan revaktsınatsııalaýdan alǵashqylardyń biri bolyp, medıtsına mamandary, ustazdar men qarýly kúshter qyzmetkerleri jáne 60 jastan joǵary tulǵalar ótedi.

«Atalǵan vaktsınalaýdyń ekinshi kezeńi 2022 jyldyń qańtar aıynda bastalady. Bul kezde, alǵashqy vırýsqa qarsy vaktsınanyń eki kezeńinen tolyq ótken oblystyń barlyq turǵyndary óz erikterimen revaktsınalaýdan ótýine múmkindik alady»,- dedi epıdemıolog -dáriger Randır Saharıev.

DDU-nyń keńesine súıensek, «Spýtnık V» vaktsınasyn qabyldanǵandar úshinshi ret egilgen jaǵdaıda «QazVac» jáne «CoronaVac» ekpelerin toǵyz aı ótkennen keıin saldyrǵany abzal.

3 jeltoqsandaǵy resmı málimetter óńirde 3046 jasóspirim, 520 laktatsııa kezeńindegi áıel men 136 júkti kelinshektiń Pfizer ekpesiniń alǵashqy bóligin qabyldaǵanyn kórsetip otyr.

Degenmen, aımaqta áli kúnge koronavırýsqa qarsy vaktsınatsııalaý júrgizilip jatqandyǵyn atap ótken jón. Qazirgi tańda ekpeniń birinshi bóligin 859 481 adam, ekinshi komponentin 790 352 turǵyn saldyrǵan.

«Almaty oblysynda koronavırýsqa qarsy vaktsınany salýǵa arnalǵan 318 egý pýnkti jumys jasap tur. Sondaı-aq, 76 jyljymaly egý pýnkti bar»,- deıdi Almaty oblysynyń sanıtarlyq-epıdemıologııalyq baqylaý departamentiniń baspasóz hatshysy Álııa Shagıahmet.

Eske sala ketsek, Almaty oblysynda barlyǵy 57 365 koronavırýsqa shaldyqqan naýqas tirkeldi, onyń ishinde 42877 adamnan KVI belgileri anyqtalyp, 56 647 adam emdelip shyqty. Al ótken táýlikte oblysta 38 adamnan koronavırýs anyqtaldy.