Almaty oblysynda 22 myńǵa jýyq agrosharýashylyq jumys isteıdi
Raıymbek aýdany bıylǵy jyldy jaqsy kórsetkishtermen qorytyndylamaq. Máselen, sońǵy 10 aıda aýylsharýashylyq ónimi 25,7 mlrd teńgege jetken. Ótken jylǵy kórsetkishpen salystyrǵanda 1 mlrd 103 mln teńgege artyq oryndalyp otyr. Aımaqta atqarylǵan jumystar men keler jylǵy josparmen aýdan ákimi Nurjan Qudaıbergenov «Jetisu media» alańyna kelip bólisti.
Raıymbek aýdany aýylsharýashylyqqa qolaıly meken. Sondyqtan osy salanyń damýy qarqyndy. Aımaqta qazir iri qara, usaq mal men eginshilikti kásip etken 22 myńǵa jýyq sharýashylyq bar. Onyń 80-nen astamy asyldandyrýmen aınalysady. Óńirde kartop ósirip ony óńdeý jumysy da belsendi. Bıyl 6 myń gektar alqapqa kartop egilip, ár gektarynan 208 tsentner ónim alynǵan. Oblys ákiminiń tikeleı qoldaýymen kartop óndirý baǵytynda 3 servıstik daıyndaý ortalyǵy quryldy. Jyl basynan beri 316 mln teńgege 80-nen asa aýylsharýashylyq tehnıkasy satyp alyndy.
2018 jyly Tuńǵysh Prezıdent sheshimimen ekige bólingen Raıymbek aýdanynda keler jyly etti óńdeý, eksportqa shyǵarý jumysyna den qoıylmaq. Munan bólek, aımaqta aýyl sharýashylyǵyna ınvestıtsııa tartý jumysy da qarqyndy. Qaqpaq aýyldyq okrýgindegi qaraqat alqabymen aınalysatyn «Tengrı Lend» JShS 677,3 mln teńge ınvestıtsııa quıdy. Búginde 1 mln 265 myń dana qaraqat kósheti men 2 mln dana tańquraı otyrǵyzyldy. 2020 jyly osyǵan taǵy ınvestıtsııa tartý josparlanǵan. Sonymen qatar, aýdanda qurylys salasynda da oń kórsetkishter bar.
«Aýdanymyzda halyqty turǵyn úımen qamtý basty nazarda. Bıylǵy jyly demeýshiler kómegimen turmysy tómen otbasylarǵa 20 úı satyp alynyp berildi jáne bıýdjetten kópbalaly jáne az qamtylǵan 14 otbasyna 60 mln 800 myń teńgege baspana satyp alyndy. Olar Táýelsizdik kúni qarsańynda beriledi», - dedi Raıymbek aýdanynyń ákimi Nurjan Qudaıbergenov.
Atqarylǵan jumystar men keler jylǵy josparmen bólisken Raıymbek aýdanynyń ákimi, baspasóz máslıhatyna kelgen jýrnalısterdiń kókeıtesti saýaldaryna jaýap berdi. Sonyń biri - aımaqta ınternetke qoljetimdilik máselesi boldy. Óńir basshysy onyń 2020 jyly tolyq sheshiletinin jetkizdi.