Almaty oblysynda 22 bala tárbıelep otyrǵan otbasynyń baspanasy órtendi
Qarasaı aýdany ákiminiń baspasóz qyzmetiniń málimetinshe, 10 aqpan kúni keshkisin Qarasaı aýdanynda jalpaq jurtqa tanymal erikti Zarına Shýmaevanyń úıi órtendi.
Órt sóndirýshiler der kezinde qyzyl jalyndy aýyzdyqtady. Nátıjesinde zardap shekkender joq. Zarına Shýmaeva aımaqta óziniń azamattyq belsendiligimen tanymal. Joldasy ekeýi 22 bala tárbıelep otyr. Oqıǵany eskere otyryp, Qarasaı aýdanynyń ákimdigi órtten zardap shekkenderdi turǵyn úımen qamtamasyz etý úshin shuǵyl sharalar qabyldady.
«Keshe olarǵa qonaqúıde turýdy usyndyq, olar bas tartyp kórshileriniń úıinde qaldy. Búginde metsenattardyń qoldaýymen biz olardyń bala sanyn eskere otyryp, ýaqytsha baspanamen qamtamasyz etpekpiz. Úı kem degende 150-180 sharshy metrdi quraıtyn bolady. Bul biraq ýaqytsha sheshim. Olardyń jaǵdaıyn basshylyqqa ala otyryp turaqty baspanamen qamtamaasyz etý úshin jumys jasap jatyrmyz. Aýdannyń atymtaı jomart azamattary, ıaǵnı metsenattar tilsiz jaýdan zardap shekken otbasy úshin úlken úı satyp alýǵa daıyn ekendikterin kórsetti», - dedi Qarasaı aýdanynyń ákimi Jandarbek Dalabaev.
Sonymen qatar, basqa kásipkerler Shýmaevtar otbasyna azyq-túlik pen kıim-keshek jınaýdy uıymdastyrǵan. Aýdan ákimdiginde atap ótkendeı, bul másele baqylaýda.