Almaty oblysynda 15 mln teńgege satylǵan mektep memleketke qaıtaryldy

ASTANA. QazAqparat – Almaty oblysynda kúrdeli jóndeýden keıin jeke qolǵa satylyp ketken mektep memleket menshigine qaıtaryldy. Bul týraly oblys ákimi Marat Sultanǵazıev aıtty, dep habarlaıdy QazAqparat tilshisi.

«Jalpy mektepterdiń tapshylyǵy anyq. Búginde 51 úsh aýysymdy mektep bar. Satylǵan mektep týraly aıtsaq, biraz sottastyq. 8 maýsym kúni alǵan adam, mektepti óz erkimen Úkimetke qaıtaryp berdi», - dedi Marat Sultanǵazıev Ortalyq kommýnıkatsııalar qyzmetiniń kóshpeli baspasóz máslıhatynda.

Eske sala ketsek, buǵan deıin Májilis depýtaty Maqsat Tolyqbaı Almaty oblysynda memlekettik mekteptiń 15 mln teńgege satylyp ketkeni týraly másele qozǵaǵan edi.

«Ótken aptada ǵana óńirden keldim, saparmen. Sumdyq aıtaıyn, biz bar mekteptiń ózin satyp jatyrmyz. Almaty oblysy Qarasaı aýdany Shalqar aýylynda Lomonov deıtin orta mektep bolǵan. 250 balaǵa arnalǵan. Sońǵy jyldary kúrdeli jóndeýden ótti. Jańa sportzal saldy, balalar qýanyp júrgende sol mektepti jeke qolǵa satyp jiberdi», - degen edi depýtat Májilis otyrysynda.