Almaty oblysynda 122 synyp karantınge jabylyp, eki myńǵa jýyq oqýshy qashyqtan oqyp júr

TALDYQORǴAN. QazAqparat - Almaty oblysynda 301 oqýshy koronavırýs juqtyryp, emdelip jatyr. Saldarynan 122 synyp karantınge jabyldy, dep habarlaıdy QazAqparat tilshisi.

Qazir indetti juqtyrǵan 301 oqýshynyń barlyq synyptastary ıaǵnı 1489 oqýshy qashyqtan oqytýǵa jiberildi.

Oqýshylar arasynda indetti eń kóp juqtyrǵandardyń ishinde Taldyqorǵan qalasy birinshi orynda tur.

Oblys ortalyǵynda 80 oqýshydan COVID-19 anyqtalǵan.

Máselen qaladaǵy Lomonosov atyndaǵy №5 mekteptiń 35 oqýshysy koronavırýs juqtyrsa, №25 mektepten 11 oqýshy, al №28 IT lıtseı-mektepten 7 oqýshydan koronavırýs anyqtalǵan.

«50 ustazdan koronavırýs anyqtaldy. Ol kisiler em qabyldaýda jáne de mektepke deıingi bilim mekemelerinde 12 jaǵdaı tirkelgen», - dedi Almaty oblystyq bilim basqarmasynyń bólim basshysy Álisher Syrym.

Al aýdandardyń ishinde koronavırýs juqtyrǵan oqýshylardyń kóbisi Eńbekshiqazaq, Uıǵyr, Talǵar aýdanynda tirkelgen.

Máselen Eńbekshiqazaq aýdanynda 32, Uıǵyr aýdanynda 26, Talǵar aýdanynda 22 oqýshy indetti juqtyryp, qazir úılerinde emdelip jatyr.

Jalpy Almaty oblysynda qazir koronavırýs jaǵdaıyna baılanysty 1790 bala úıinde bilim alyp júr.

Onyń ishinde indet juqtyrǵandarmen baılanysta bolǵandar da bar.