Almaty oblysynda 120 oryndyq mektep paıdalanýǵa berildi
Konstıtýtsııa jáne bilim kúni qarsańynda Aqqudyq aýylyndaǵy Baıbatshaev atyndaǵy 120 oryndyq mektep saltanatty túrde ashyldy. Buǵan deıin appaty dep tanylǵan burynǵy mektep ótken jyldyń jeltoqsan aıynda jumysyn toqtatqan bolatyn. Jańa mektepke 703,030 mln teńge qarjy bólinip, merdiger kompanııa «Nur-Shapaǵat Kurylys» JShS nysandy merziminde aıaqtaǵan. Eki jyl kepildik berilgen mektep ishi tolyqtaı zamanaýı materıaldyq bazamen qamtylǵan.
Ashylý saltanatyna qatysqan aýdan ákimi Talǵat Ómirálıev Konstıtýtsııa kúnimen quttyqtap, óńirdegi bilim salasyndaǵy atqarylyp jatqan jumystarǵa toqtaldy.
«Qazirgi ýaqytta jyl saıyn aýdanymyzda 2-3 mektepti túrli baǵytta kezeń-kezeńimen jańartyp jatyrmyz. Bıyldyń ózinde eki mektep salynyp jatyr. Birnesheýine kúrdeli jóndeý jumystary júrgizilmek. Mine, kópten kútken osy aýyldyń mektebi sizderdiń ıgilikterińizge berildi. Barsha búldirshinderdi jańa bilim kúnimen quttyqtaımyn»,- dedi aýdan basshysy.
Al, jańa oqý jylyn jańa mektepte bastaǵan Zańǵar Aıtqojanyń qýanyshynda shek joq.
«Burynǵy mektepte sport zal joq bolatyn. Jazda dalada júretin edik. Endi jańa mektepte bári bar. Men sportpen aınalysamyn. Bolashaqta chempıon atanǵym keledi. Mektep salyp bergen barsha aǵalarǵa rahmet aıtamyn», - dedi ol.
Jurt ıgiligine berilgen mektep 2736,84 sharshy metr aýmaqty alyp jatyr. Tolyq orta bilim beretin oqý ordasynda 126 oqýshyǵa 28 ustaz bilim beredi. Jalpy aýdanda 27100 oqýshy bar. Oqý jyly qarsańynda aýdan boıynsha 2700 bala mektep tabaldyryǵyn attasa sonyń 11 oqýshysy Aqqudyq aýylynyń búldirshinderi.
Budan bólek Panfılov aýdanyndaǵy shekara shebindegi aýyldardyń mektepteri jańartylyp jatyr. Basqunshy aýylyna 300 oryndy orta mekteptiń qurylysyna 1 mlrd 709,483 mln teńge bólinse, Qorǵas aýylyndaǵy orta mektepti kúrdeli jóndeýge 352 mln 970 614 teńge qarajat bólindi. Qazirgi ýaqytta eki nysannyń da qurylys jumystary bastalǵan.
Sondaı-aq, Kishishyǵan aýylyndaǵy orta mekteptiń ǵımaratyn kúrdeli jóndeýden ótkizýge jobalaý-smetalyq qujattaryn daıyndaýǵa oblystyq bıýdjetten 15,5 mln teńge bólinip, konkýrs jarııalandy. Keler jyly eki mektepke kúrdeli jóndeý júrgizilmek.