Almaty oblysynda 11 mektep oqý jylyna áli daıyn emes

QONAEV. QazAqparat - Oqý-aǵartý mınıstriniń tapsyrmasy boıynsha orta bilim komıteti Almaty oblysynyń 11 mektebiniń kúrdeli jóndeýine monıtorıng júrgizdi. Jumys sapary barysynda mınıstrlik ókilderi belgilengen merzimde jumystardy sapaly aıaqtaý týraly usynymdar berdi, dep habarlaıdy QazAqparat.

Orta bilim berý komıtetiniń habarlaýynsha, jóndeýden ótip jatqan mektepterdiń kóbi 1970-1980 jyldardyń basynda salynǵan.

Olardyń qatarynda Qonaev qalasynyń Q.Qaısenov atyndaǵy №4, Іle aýdany Ekpindi aýylynyń №2 orta mektepteri, Eńbekshiqazaq aýdany Esik qalasynyń A. Malkeev atyndaǵy Bilim-ınnovatsııa lıtseıi, Shelek aýylynyń Abaı atyndaǵy, Esik qalasynyń Abylaıhan atyndaǵy №4 orta mektepteri, Qaskelen qalasynyń Q. Sátbaev atyndaǵy mektebi, Kegen aýdanynyń Jańabaev atyndaǵy, Talǵar aýdanynyń K.Nurpeıisov atyndaǵy, №10, № 12 orta mektepteri bar.

Qazirgi ýaqytta barlyq 11 bilim nysanynda demontaj jáne seısmıkalyq kúsheıtý jumystary júrip jatyr.

«Orta bilim komıteti men mınıstrliktiń aýmaqtyq bólimsheleri birlesip mektepterdiń jańa oqý jylyna daıyndyq deńgeıine monıtorıng júrgizdi. 11 bilim berý obektisinde keshendi jóndeý jáne mektep aýmaǵyn abattandyrý boıynsha jumystar júrgizilýde. Olardyń basym bóliginde jóndeý jumystary maýsym aıynda bastalǵan. Shartqa sáıkes aıaqtalý merzimi 6 aıdan 11 aıǵa deıin sozylýy múmkin, ıaǵnı oqý jylynyń basynda mektepter balalardy qabyldaýǵa daıyn bolmaıdy. Biz bilim basqarmasymen birlesip oqý-tárbıe protsesin uıymdastyrý úshin bilim alýshylardyń ýaqytsha ornalasý oryndaryn belgiledik. Óz kezeginde merdiger uıymdar jóndeýdi belgilengen merzimnen buryn aıaqtaýǵa daıyn», - dep atap ótti orta bilim komıteti basqarmasynyń basshysy Gúlnar Talasbaeva.

Orta bilim komıtetiniń usynymdary boıynsha bilim basqarmasy men mektepter ár mektep boıynsha modıfıkatsııalaý josparyn ázirledi.

Bilim basqarmasyna jaqyn ornalasqan basqa mektepterdiń jobalyq qýattylyǵyn eskere otyryp, barlyq oqýshylardy oqytýmen qamtamasyz etý boıynsha tapsyrma berildi.

Sondaı-aq, ata-analarmen, pedagogıkalyq qoǵamdastyqpen aqparattyq-túsindirý jumystaryn júrgizý, jumystardy belgilengen merzimde sapaly aıaqtaý, jóndeý jumystarynyń barysyn qadaǵalaıtyn monıtorıngtik jumys toptaryn qurý boıynsha usynystar berildi.

Aıta ketý kerek, mınıstrlik elimizdiń basqa da óńirlerindegi bilim berý uıymdarynda monıtorıng jumysyn jalǵastyrady.