Almaty oblysynan tabylǵan qar barysy haıýanattar baǵyna jetkizildi

ASTANA. QazAqparat – Almaty oblysynda er adam mal baǵyp júrip jol-jónekeı álsiregen qar barysyn kezdestirgen. Ol dereý quzyrly organdarǵa habarlasyp, búginde janýar qamqorlyqqa alyndy, dep habarlaıdy QazAqparat tilshisi.

Áleýmettik jelide qamaýda bolǵan qar barysynyń vıdeosy tarady.

«Almaty oblysynda turǵyndar qorshaýǵa qamalǵan qar barysyn vıdeoǵa túsirgen. Oqıǵanyń Almaty oblysy Narynqol aýylynda bolǵany aıtylǵan. Qyzyl kitapqa engen janýardy nege qamap qoıǵan? Ókinishke qaraı, ol jaǵyn anyqtaý múmkin bolmady», - delingen jazba astynda.

Jelidegi jarııalanymǵa Orman sharýashylyǵy jáne janýarlar dúnıesi komıteti túsinik berdi.

«19 sáýir kúni Almaty oblysy Raıymbek aýdandyq polıtsııasynyń kezekshi bólimine Sarybastaý kentiniń turǵyny mal jaıý kezinde álsiregen qar barysy (artqy aıaqtarynyń qozǵalys fýnktsııalary buzylǵan) kezikkeni jaıly habar tústi. Oqıǵa ornyna «Ohotzooprom» ÓB» RMQK ınspektorlary, Raıymbek aýdany polıtsııa bólimi qyzmetkeri men tabıǵat qorǵaý polıtsııasy baryp, akt toltyryldy», - delingen resmı habarlamada.

Sondaı-aq, komıtet Qyzyl kitapqa engen janýar 20 sáýir kúni Almaty haıýanattar baǵyna jetkizilgenin habarlady.