Almaty oblysynan 6 sportshy Tokıo Olımpıadasynda el namysyn qorǵaıdy

TALDYQORǴAN. QazAqparat - Almaty oblysynyń 6 sportshysy bıyl jazda Japonııa astanasy Tokıoda ótetin Olımpıada oıyndarynda el namysyn qorǵaıdy. 4 sportshy sadaq atýdan joldama jeńip alsa, bir sportshy grek-rım kúresinen jáne bir sportshy jeńil atletıka boıynsha óner kórsetedi, dep habarlaıdy QazAqparat tilshisi.

Aldaǵy Tokıo Olımpıadasyna oblys sportshylary 6 lıtsenzııa utyp aldy. Olar – sadaq atýdan Sanjar Musaev, Denıs Gankın, Ilfat Abdýllın, jeńil atletıkadan Aıman Ratova, grek-rım kúresinen Ashat Dilmuhamedov. Sonymen qatar sadaq atý boıynsha bir komandalyq joldama oblys qorjynynda.

Keshe Taldyqorǵanda Almaty oblysynyń sport salasyndaǵy ótken jylǵy jetistikteri qorytyndylanyp, úzdikter marapattaldy.

Óńir basshysy marapattaǵandar qatarynda jeńil atlet Aıman Ratova da bar. Sporttyq júrýden el namysyn qorǵaıtyn atlet 2012 jylǵy London olımpıadasynan keıin turmysqa shyǵyp, bes jyl úlken sporttan qol úzip qalǵan. Eki balanyń anasy sportqa qaıta oralǵanyna qýanyshty ekenin jasyrmaıdy. Ol jýyrda Túrkııanyń Antalııa qalasynda ótken halyqaralyq jarysta júldeli úshinshi oryndy ıelenip, Olımpıada lıtsenzııasyn jeńip aldy.

«Eń aldymen qazaq eliniń úmitin aqtaýǵa tyrysamyn. Ol úshin kóp eńbek ettik. Kóp ter tóktik. Áli de eńbek etý kerek. Maqsatyma jetemin degen úmittemin», - deıdi sportshy.

Aıta keteıik, ótken jyly jetisýlyq sportshylar 2537 medal jeńip alǵan, sonyń 906-sy – altyn, 709-y – kúmis, 922-si qola boldy.

Jyl saıyn jergilikti bıýdjetten 108 úzdik sportshyǵa aı saıynǵy stıpendııa tólenip otyrady. Sonyń ishinde 28 sportshy – múmkindigi shekteýli jandar.

Foto: romper.com