Almaty oblysyna 127 mlrd teńge ınvestıtsııa tartyldy – Amandyq Batalov

NUR-SULTAN. QazAqparat – Almaty oblysynyń ákimi Amandyq Batalov óńirdiń áleýmettik-ekonomıkalyq damý kórsetkishterin baıandady, dep habarlaıdy QazAqparat tilshisi.

«Іndet saldarynan týyndaǵan daǵdarysqa qaramastan, turaqty damý prıntsıpteriniń basymdyǵy saqtaldy. Sondyqtan Memleket basshysy ekonomıkalyq damýdyń joǵary qarqynyn qalpyna keltirý, ınvestıtsııa tartý men halyqtyń tabysyn arttyrý mindetterin alǵa qoıdy. Jyl basynan bergi 4 aıda oblysta barlyq negizgi salalarda ósim qamtamasyz etildi. Ónerkásip óndirisiniń kólemi 15,3%-ǵa, qurylys jumystary – 4,2%-ǵa, saýda – 3,7%-ǵa, aýyl sharýashylyǵy – 0,5%-ǵa ulǵaıdy», - dedi A. Batalov QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha, memleket bıýdjetine 220 mlrd teńge mólsherinde túsim túsken, bul ótken jyldyń osy kezeńimen salystyrǵanda 1,5 esege kóp (151 mlrd teńge).

Oblys ekonomıkasyna 1,6% ósimmen 127 mlrd teńge ınvestıtsııa tartyldy. Jyl sońyna qaraı ınvestıtsııa kólemi 811 mlrd teńge deńgeıinde boljanýda.

«2025 jylǵa qaraı jalpy ishki ónimdegi ınvestıtsııa kólemin 30% deıin ulǵaıtý mindetterin oryndaý úshin 45 myń jumys ornyn quratyn, 5,4 trln teńgelik 562 jobadan turatyn ınvestıtsııalyq portfel qalyptasty. Onyń 327-si júzege asyp jatyr, olar turaqty ınvestıtsııa legin qamtamasyz etedi. Munda 9 Transulttyq kompanııa óziniń eleýli úlesin qosty. Ótken jyldardan beri jumys istep turǵan «Mareven Fýd», «Lýkoıl», «Willo» kásiporyndary men bıyl iske qosylǵan «Alatsem» tsement zaýyty men «Fıd Mılls» qurama jem zaýyty óndiristeriniń jalpy kólemi 165 mlrd teńgeni kórsetti. Aldaǵy ýaqytta transulttyq kompanııalardyń taǵy 5 jobasy iske qosylǵanda olardyń jalpy ónerkásip óndirisindegi úlesi 25% bolady», - dedi A. Batalov.