Almaty oblysy Naýryz meıramyn qalaı atap ótýde

TALDYQORǴAN. QazAqparat - Naýryz meıramyna oraı taldyqorǵandyqtar men qala qonaqtaryna 5 myń lıtr Naýryz kóje men 1 tonna baýyrsaq tegin taratyldy. Sondaı-aq saýdagerler de kójeni 100-200 teńgeden satyp, saýdalaryn qyzdyrdy, dep habarlaıdy QazAqparat tilshisi.

Qyran búrkit ustap, tazy ıtpen sýretke túsý de aqyly boldy. Estelik sýrettiń quny - 500 teńge. Ol jerde óz uıaly telefonyńyzben tússeńiz de osy aqshany tóleısiz. Ulystyń uly kúnin jetisý jurtshylyǵy «Jastar» saıabaǵynda toılady. Altynaı Jorabaeva, Alısher Karımov syndy estrada juldyzdary men oblystyq óner ujymdary jetisýlyqtarǵa merekelik kóńil kúı sylaıdy. Osy jerde ata-analardyń suraýymen oblys ákimi Amandyq Batalov «Tusaý keser» rásimin oryndap, kishkentaı búldirshinderge estelik syılyqtar úlestirildi. «Jastar» mádenı-demalys saıabaǵynyń kireberisinde «Jetisý» telearnasynyń 20 jyldyǵyna arnalǵan kórme, merekelik baǵdarlamalar, ulttyq qolóner kórmesi, ulttyq oıyndar jáne taǵy basqa oıyn-saýyq usynyldy. «Naýryz tartýy» degen atpen ulttyq taǵamdar - jent, talqan, balqaımaq, kilegeı, qurt, súzbe, ýyz, irimshik jáne basqa da dámder, sol sııaqty ulttyq syı-kádeler qoıyldy. «Uly Dalanyń jeti qyry» kıiz úıler alańynda jeti kıiz úı tigilip, Elbasy baǵdarlamasy boıynsha «Ashyq aspan astyndaǵy murajaı ekspozıtsııasynyń» kórmeleri tanystyryldy.

«Áz Naýryz - eńsesi bıik eldiktiń, irgesi bekem birliktiń, sarqylmas yrystyń bastaýy. Ulystyń uly kúnin halqymyz jyl saıyn shat kóńil, keń peıilmen qarsy alady. Bul mereke kóp etnosty Qazaqstan halqyn dostyq pen tatýlyqqa shaqyryp, ıgi isterge jumyldyryp keledi. Jyl basy sanalatyn osy mereıli kúninde ótken jyl elimiz úshin tabysty kezeń bolǵanyn rızashylyqpen aıtamyz. Jyl basy - Naýryz Otanymyzǵa jańa tabystar ákelsin. Qazaqstannyń abyroıy artyp, aıbyny asqaq bolsyn! Ulystyń Uly kúni ár shańyraqqa baqyt pen shattyq ornap, qut darysyn! Barshańyzǵa kóktemdeı kóńil kúı, molshylyq, bereke-birlik tileımin! Ulys oń bolsyn, mereke qutty bolsyn!» - dedi jınalǵan qaýymdy merekemen quttyqtaǵan oblys ákimi Amandyq Batalov.

Ulystyń Uly kúni - Naýryz merekesi Taldyqorǵan qalasynda bulaqtyń kózin ashyp, № 28 ІT-mekteptiń aldyna aǵash otyrǵyzýdan bastaldy. Bul iske oblys ákimi Amandyq Batalovpen birge aqsaqaldar men zııaly qaýym ókilderi, Assambleıa músheleri, jastar men oqýshylar atsalysty. Qalanyń 8-shi shaǵyn aýdanyndaǵy 56 páterli turǵyn úı paıdalanýǵa berilip, kiltteri tapsyryldy. Keshke «Jastar» saıabaǵynda «Kóktem merekesiniń jaryq juldyzdary» atty eki saǵattyq dıskobaǵdarlama uıymdastyrylady.