Almaty oblysy: Kásipkerlerdiń 65,5 mln teńge salyqqa qatysty máselesi sheshildi
Bul týraly Almaty oblysy kásipkerler palatasynyń sarapshysy Sanat Túsipov málimdedi. Jalpy 2018 jyly óńirlik palataǵa salyqtyq qatynastar máseleleri boıynsha 110-nan astam ótinim kelip túsken. Máselen, «ıA Lan Gan Sý» JShS ótinimi oń sheshimin tapty. Buǵan deıin Memlekettik kirister basqarmasy kompanııaǵa «151,2 mln teńge tabysyn jasyrdy» dep eskertý jasaǵan. Kompanııa óńirlik kásipkerler palatasyna ótinim jasaǵan soń mamandar kompanııanyń býhgalterlerimen birlesip, qajetti qujattardy basqarmaǵa tapsyrdy. Osy kezdesý barysynda 151,2 mln teńge - óndiristiń azaıýy saldarynan paıda bolǵan 2016 jyl jáne 2017 jyldyń arasyndaǵy salystyrmaly jyldyq kiristiń aıyrmashysy ekeni dáleldendi. Memlekettik kirister basqarmasy JShS tapsyrǵan qujattardy jáne keltirilgen dáıekterdi tekserip, nátıjesinde eskertýdi alyp tastady.
Sonymen qatar 2018 jyly Eńbekshiqazaq aýdanynda «Ekstremal Sport-týrızm» JShS men Jer qatynastary bólimi arasyndaǵy daý sheshilgen bolatyn. Memlekettik organ jer telimine 17,3 mln teńge kóleminde salyq salǵan. Almaty oblysy boıynsha memlekettik kirister basqarmasy tarapynan bolǵan qoldaý, sondaı-aq, birlesken kezdesýler, ınvestıtsııalyq jobany rastaıtyn qujattar usynylyp, Salyq kodeksi boıynsha jeńildikter kórsetilgen soń belgilengen salyq alynyp tastaldy. Nátıjesinde 2018 jyly óńirlik kásipkerler palatasy kásipkerlerdiń 65,5 mln teńge salyqqa qatysty múddesin qorǵady.
«Memlekettik kirister departamenti - «Atameken» UKP-nyń strategııalyq seriktesteriniń biri. Departament basshylyǵy men mamandarynyń belsendi atsalysýyn erekshe atap ótken jón. Olar kásipkerlerge qol ushyn sozýǵa daıyn ári oryn alǵan máseleni tez sheshýge yntaly. Birlesken túsindirý jumystary Býhgalterler klýby jáne «Salyq qyzmetkeri saǵaty» jobasy sheńberinde júrgizildi», - dedi ÓKP sarapshysy Sanat Túsipov.