Almaty oblysy bıyl 42 myń tonna taza qant óndirýdi josparlaýda
Jalpy, bıyl oblysta qant qyzylshasynyń egis alqaby 2,1 myń gektarǵa ulǵaıtylyp, 16,1 myń gektarǵa jetti.
Oblystyq aýyl sharýashylyǵy basqarmasynyń málimetinshe, Kóksý jáne Aqsý qant zaýyttary bıylǵy egindi óndirý men qabyldaýǵa 100% daıyn. Qabyldaýdyń birinshi kúninde Eskeldi, Kóksý, Qaratal aýdandary men Taldyqorǵan qalasynyń aýylsharýashylyq taýar óndirýshileri Kóksý qant zaýytyna 400 tonnadan astam qant qyzylshasyn jetkizdi.
Zaýyt dırektory Altynbek Abbatovtyń aıtýynsha, Kóksý qant zaýyty 80% jańartylyp, óndiris tolyǵymen avtomattandyrylǵan. Bul, qanttyń sapasyn edáýir arttyrady. Qant zaýytynyń tabıǵı gazǵa kóshýi óte mańyzdy másele. Zaýyt ekologııalyq taza otynmen ekinshi jyl jumys isteýde. Bul ekonomıkalyq jáne aımaqtyq ekologııa úshin óte tıimdi. Eger buryn maýsym kezinde kásiporyn 10 myń tonna mazýt jaqsa, kógildir otynǵa qosylǵan kezde janarmaı quny 1,5 esege tómendedi.
«Búgingi tańda Kóksý qant zaýytynyń qural-jabdyqtary aǵymdaǵy jáne kúrdeli jóndeýden tolyǵymen ótkizildi. Qyzylsha qabyldaý pýnktinde salmaq ólsheıtin qural aýystyryldy. Onyń ornyna elektrondy qondyrǵy ornatyldy. Býrt tóseıtin mashınalardyń barlyǵyna kúrdeli jóndeý júrgizilip, barlyǵy 5 mashına jumys istep tur. Zaýytta sonymen qatar shıkizatty qaıta óńdeý jelisi bar. Bul kásiporynnyń jyl boıyna jumysyn qamtamasyz etedi. Jóndeý kezinde zaýyt 250-den astam adamdy jumyspen qamtydy. Maýsym aıynda 200-ge jýyq adam turaqty jumysqa tartylady. Kásiporyndy jańǵyrtý jumystary jalǵasýda», – dedi zaýyt dırektory A. Abbatov.
Ótken jyly Kóksý qant zaýyty 230 myń tonna shıkizatty óńdep, 20 myń tonnadan astam túıirshiktelgen qant óndirdi.
«Bıyl Almaty oblysynda 500 myń tonna tátti túbir jınap, shamamen 42 myń tonna qant óndirý josparlanǵan», - delingen Almaty oblysy ákimdigi baspasóz qyzmetiniń aqparatynda.