Almaty oblysy aldaǵy ýaqytta respýblıkalyq bıýdjet donory bolýǵa qaýqarly

NUR-SULTAN. QazAqparat – Jańadan qurylǵan oblystarda ónerkásip óndirisiniń kólemi artady. Bul týraly QR Ulttyq ekonomıka mınıstri Álibek Qýantyrov málim etti, dep habarlaıdy QazAqparat tilshisi.

«Osy óńirlerdegi áleýmettik-ekonomıkalyq kórsetkish ósiminiń qarqynyna toqtalǵym keledi. 2022 jyldyń qorytyndysy boıynsha Abaı oblysyndaǵy óńirlik jalpy ónim kólemi - 2 trln teńgege deıin, Jetisý oblysynda 1,1 trln teńgege deıin artady, al Ulytaý oblysynda óńirlik jalpy ónim - 1,2 trln teńge», - dedi Álibek Qýantyrov Ortalyq kommýnıkatsııalar qyzmetinde.

Onyń aıtýynsha, 2022 jyly Abaı oblysynyń jeke tabysy 70 mlrd teńgeni, Jetisý oblysynda – 58 mlrd teńgeni, Ulytaý oblysynda 48 mlrd teńgeni qamtıdy.

«Aldyn ala jasalǵan esepteýlerge qaraǵanda, jańadan qurylǵan Almaty oblysy aldaǵy ýaqytta respýblıkalyq bıýdjettiń donory bolýǵa qaýqarly. Sonymen qatar, jańadan qurylǵan óńirler boıynsha ónerkásip óndirisiniń kólemi artady. Onyń ishinde Abaı oblysynda 1 trln teńgege deıin, Jetisý oblysynda – 275 mlrd teńgege, Ulytaý oblysynda 855 mlrd teńgege artady», - dedi mınıstr.

Budan buryn habarlanǵandaı, Álibek Qýantyrov jańadan qurylǵan oblystarda ınfraqurylym men joldardyń sapasyna qatysty problema bar ekenin aıtty.

Ótken aptada Berik Ábdiǵalıuly Ulytaý oblysynyń ákimi laýazymyna taǵaıyndaldy.

Sonymen qatar, Marat Sultanǵazıev Almaty oblysynyń ákimi boldy, Nurlan Uranhaev Abaı oblysynyń ákimi laýazymyna taǵaıyndaldy.

Al Jetisý oblysynyń ákimi qyzmetine Beıbit Isabaev keldi.